VIRGEN DOLOROSA, sumbanan sa malaumong simbahan ug nagapasayon sa panaw padulong sa Diosnong Gingharian

Malipayon nga gisaulog ang ika-64th Parochial Fiesta ni Virgen Dolorosa sa Babak District Island Garden City of Samal niadtong September 15, 2025. Atol usab sa Misa gipahigayon ang Installation ni REV. FR. PROCESO GIMENO, JR., ang bag-ong kura paroko sa Virgen Dolorosa Parish ug ang presentation ni REV. FR. GEORGE GARCIA isip Parochial Vicar.

Gipangulohan ni Most Rev. Romulo G. Valles, D.D., Arsobispo sa Davao, ang Pontifical Mass sa alas 9:00 sa buntag uban ni Rev. Fr. Proceso Gimeno, Jr. – Parish Priest , Rev. Fr. Jing Garcia, SVD – Parochial Vicar, Msgr. Jaime Gamboa – Chancellor, Fr. Dexter Veloso, Fr. Ricky Penalosa, Fr. Mark Kim Samones, ug ang tulo ka Parish Priest sa parokya sa Isla.

Human sa pagbasa sa ebanghelyo gisunod dayon ang pagbasa sa appointment letter ug Installation sa bag-ong parish priest sa Virgen Dolorosa Parish nga si Rev. Fr. Proceso Gimeno, Jr.

Sa pamalandong ni Arsobispo Valles sa iyang homiliya, gihatagan niya og importansya ang mainiton nga pagdawat sa bag-ong kura paroko sa Babak. Nanghinaot siya nga suportahan ang bag-ong pari aron mapadayon niini ang pagpalambo sa parokya ug ang serbisyo sa katawhan sa Babak. Mapasalamaton usab siya tungod sa presensiya sa LGU officials headed by Hon. Mayor Lemuel “Toto”Reyes, GSLs, center organizations ug sa tanang katawhan nga nakigduyog sa kapistahan ni Virgen Dolorosa.

Dugang sa iyang pamalandong gihatagan og importansiya ang pito ka punyal nga nagtusok sa dughan ni Maria nga nagsimbolo sa kasakit ni Maria aron mapamalandungan sa mga parokyano ang kaagi ni Birhen Dolorosa.

• Ang propesiya ni Simeon sa Templo,
• Ang paghalad ni Jesus ngadto sa Templo,
• Ang pagkagiw ngadto sa Ehipto,
• Ang pagkawala ni Jesus ngadto sa Jerusalem,
• Ang panagtagbo ni Jesus ug Maria sa Kalbaryo,
• Ang paglansang ni Jesus sa Krus,
• Ang pagkanaog sa lawas ni Jesus sa Krus ug ang paglubong kang Jesus.

Dungag pa sa Arsobishop nga isip mga Kristiyano atong ipakita ug sundon ang hiyas ni Birhen Dolorosa nga mag mainantuson ug mapagmahal nga inahan. Atong lig-onon ang pagtoo bisan sa mga kasakit nga nasinati sa matag adlaw. Sa tanang kasakit nga atong naagian, ato kining idangop sa atong mahal nga inahan Birgen Dolorosa.

Nagpadayag usab si Archbishop sa iyang takeaways: “LIFE IS FULL OF SORROWS”, but we carry all the sorrows because CHRIST is with us. “Isip mga piniyalan ni KRISTO ato gyod ipakita nga lig-on kita sa atong pagtoo ug barugan nato ang atong pagkakatoliko. Dili gyod nato kalimtan ang pag-ampo sa Ginoo sa panahon sa kalisod ug i-ampo pod ang ubang tawo labaw sa tanan ang katawhan sa tibook kalibutan pinaagi sa pangama ni Birhen Dolorosa.

Ang atong debosyon kang Mama Mary magdala kanato ngadto kang KRISTO. Isip mga piniyalan ni Kristo ug magtotoo atong ipakita ang GUGMA sa Dios, luyo sa kasakit adunay kalipay nga atong matagamtaman sa pagpuyo niining kalibutan.

Ang hagit sa pagpangga sa katawhan, giniyahan sa pangama ni Mama Mary ato kining ipadayon pinaagi sa pagdebosyon kang Birhen Dolorosa ug magdala kanato sa kadaugan ngadto sa langit.

Human sa homiliya gisunod dayon ang pagpresentar sa mga Parish Pastoral/Finance council, GSLs, ug parish staff sa bag-ong kura paroko.

Mapasalamaton ang Arsobispo kay Rev. Fr. Jun Gimeno ug Fr. Jing Garcia sa pagpangandam sa tanang kalihukan sa pista, ug sa mga proyekto nga padayon gipahimo aron mapa-anindot ang balay sa DIOS.

Gipresentar ni Fr. Jun, sa Arsobispo sa pagmisa sa kapistahan ni Birhen Dolorosa, sa tanang katawhan, Provincial and Local Government officials, Parish Pastoral Team, Parish Finance Team, Center Organizations, GKK servant leaders and church workers nga nagkahiusa ug nagtinabangay aron mahan-ay ang mga kalihokan sa fiesta.

Fr. Jing Garcia, ang nagpasalamat sa mga kaparian nga mitambong sa Misa, mission partners, sponsors, donors and benefactors.

Ang mga aktibidades sa Kapistahan mao ang mga mosunod: Pilgrimage Mass, Novena Masses, Nightly Presentations, Procession, Fiesta Masses, Baptism, GSLs’ salu-salo, Battle of the drum and lyre corp, ug Sports League.

Ang GINOO ang naghatag sa tanan busa ato usab siyang pasalamatan.

VIVA MARIA…… VIVA BIRHEN DOLOROSA!

(Junelda A. Jauod – Parish Soccom Coordinator)