Katas ng Basura Giplanuhan (Part 2)

Nagmalampuson ang gipahigayong Katas nga Basura: Ecological Reflections on the New Carmen Dumpsite niadtong Septembre 17, 2025 sulod sa Bapa Benny Tudtud Auditorium sa Ateneo de Davao University sa pakig-alayon sa University Community Engagement and Advocacy Council (UCEAC) tali sa Archdiocese of Davao Social Action Center (ASAC).

Ang maong panagtigom usa ka tawag sa pagpaminaw pag-ayo sa hilak sa kabus sa syudad sa Dabaw aron sa pagpamalandong, pakig-dayalogo ug maghimo ug dungan nga aksyon uban sa diwa sa integral ecology ug sa inambitan nga pag-amuma sa kumon nga pinuy-anan.

Atol sa open forum, milutaw ang problema sa nagkadaghan nga basura nga halos nakapuno na sa sanitary land fill sa Barangay New Carmen diin gikabalak-an ang negatibo nga epekto sa panglawas sa katawhan nga namuyo sa maong dapit ingon man sa mga komunidad nga anaa sa ubos nga bahin sa sanitary land fill.

Gipaambit sa usa sa mga parokyano sa San Pablo nga si Lani Sta. Maria nga gisugdan niya ang pag-segregate sulod sa ilang panimalay ug gitudluan ang iyang mga anak sa paghimo niini busa gikalipay sa mga basurero sanglit ang residual na lamang kon ang mga dili na marecycle o mga biodegradable ang ilang makolekta.

Samtang duna siyay gihimo nga labayanan sa ilang mga biodegradable nga gikan sa ilang kusina nga gipahimuslan na karon nila alang sa pag-abuno sa ilang mga tanom nga utanon.

Hinoon, base sa unang pagtasa sa maong kalihukan, ang pundok sa eco-convergence sa ulahing panagtigom gibati nga daghan pa ang buot nga mapaminawan nga mga kasinatian ilabi na sa mga komunidad nga naapektuhan sa sanitary land fill.

Tungod niini, nagkahiusa ang maong pundok nga gikinahanglan nga magpahigayon og ikaduhang forum alang niini kon Katas ng Basura part 2.

Gawas pa niini, giplanuhan usab nga dapiton og usab ang chairman sa komitiba sa kinaiyahan sa Sangguniang Panglunsod nga si Kagawas Temujin “Tek” Ocampo aron nga masayran ang mga lokal nga mga ordinansa ug mga plano alang sa pagtubag sa mga isyu kalabot sa sanitary land fill ug pagdumala sa mga basura sa syudad.

Sa gihimong unang forum, giangkon sa City Environment and Natural Resources (CENRO) officer nga si Mr. Rodolfo Caducoy Jr., nga kulang sa mga lithium waste management nga pasilidad sa syudad, apan sa bag-ong gi-andam nga 9 ka ektarya nga sanitary land fill, gibutyag ni Caducoy nga duna kini butanganan sa mga hazardous waste.

Hinoon, siya midugang nga dunay plano usab ang syudad nga magtukod og central material recovery (MRF) aron modawat sa mga basura gikan sa mga barangay nga wala motuman sa pagmontrar ug MRF ug walay composting.