Medical Mission ug Uban Pang Serbisyo Gipahigayon sa HFP Baliok

Malampusong gipahigayon ang Medical-Dental Mission ug uban pang serbisyo sa parokya sa Sagrada Pamilya sa Baliok niadtong Oktubre 11, 2025. Ang tunga sa adlaw nga misyon nagdapit sa mga parokyano sa pagkakonsulta sa ilang gibati, pagpa-ibot sa ngipon, pagpahiling sa mata, bone scanning, ECG, FBS. Human sa konsultasyon, nakadawat ang mga beneficiaries ug libreng tambal ug bitamina subay sa ilang reseta.

Sa maong higayon, ubay-ubay usab ang nakadawat sa libreng gupit. Aduna poy pipila ka mga indibidwal ang niduol sa pwesto sa Family and Life Apostolate (FLA) alang Natural Family Planning.

Wala gayod nagutman ang mga volunteers ug ang mga nitambong tungod sa libreng painit sama sa lugaw nga giandam sa mga sakop sa Knights of Columbus, lomi gikan sa SAMAKABA (Samahan ng mga Kababaihan sa Baliok), sipao, juice ug ice cream nga giandam sa pipila ka mga indibidwal.

Dako kaayo ang pasalamat sa Health Team Coordinator, Dr. Ruby Ann Limpot sa pagtinabangay sa mga katawhan ug mga ministriya aron sa pagpahigayon sa maong misyon. Nagpasalamat siya ug dako sa mga doktor, dentista, pharmacists, optometrist, medtech, volunteers, donors ug sponsors sa kalampusan sa maong aktibidad. Siya usab nagpasalamat sa kura-paroko, Fr. Diony Tabiliran ug Fr. Danny Dotollo sa pagsuporta ug paggiya sa maong aktididad.

Ang Medical-Dental Mission Plus kabahin sa selebrasyon sa ika-21 nga annibersayo sa katukuran sa Parokya sa Sagrada Pamilya niadtong Oktubre 2, 2025. (Flor Arellano-Deloria, HFP SoCCoM)