Ipatunhay ang kaangayan

Ika-33 nga Domingo sa Ordinaryong Panahon (November 16, 2025)
Mal 3:19-20 / Ps 98:5-6, 7-8, 9 / 2 Thes 3:7-12 / Lk 21:5-19

Usa na lang ka Domingo ug matapos na ang gitawag nato nga Ordinaryong Panahon sa atong liturhiya o kinabuhi sa pag-ampo isip mga Katolikong magtutoo. Human nato masubay ang kinabuhi ni Kristo, masangyaw ug napaningkamutan nga mahimong kabahin gayod sa atong matag adlaw nga pagpuyo ang iyang kinabuhi nga atong gisunod, susihon nato kung makapasa ba kita sa iya unya nga pag-abot.

Tataw sa mga pagbasa nga dako ang pagsulay kanatong mga magtutoo ang atong atubangon. Sa Ebanghelyo, si Jesus naghisgot mahitungod sa nindot nga templo nga moabot ang panahon nga walay mahibilin niini bisan usa ka bato. Kining tanan matumpag. Bisan ang mga magtutoo kasilagan sa tanan. Kini na unya ang giingon sa unang pagbsa nga ang mga mapahitas-on ug ang nagbuhat sa dautan pagasunogon. Wala nay sanga ug gamut nga mahibilin. Mao nga sa ikaduhang pagbasa, gipahimangnoan kita ni San Pablo nga magbudlay ug molihok. Dili angayan nga mangitag gubot ug angay maghago ug magbuhat og maayo aron makakaon. Aduna gayoy mga tawo sa pagkakaron nga wala maghuna-huna sa kataposan sa panahon. Kini sila ang wala nagbudlay sa ilang gikaon. Gipahimuslan hinuon ang unsay iya sa uban. Sila nagpahayahay samtang ang uban nagpait. Kini sila kabahin sa atong paghinulsol aron maandam kitang tanan kung moabot na ang kataposan.

Angayan lamang kita nga magmalig-on ug magmakanunayon tungod kay matod pa sa Ebanghelyo, walay usa ka buhok nato nga mawala. Dili gani kinahanglang maghuna-huna unsay isulti kay ang Ginoo manalipod sa magpabiling matinud-anon kaniya. Matod sa unang pagbasa, alang sa mga adunay kahadlok sa Ginoo, ang iyang adlaw sa kaangayan mobutho. Ang makaalim nga banag-banag sa Dios moabot aron molamdag sa mangitngit nga kahimtang. Ang mga nagbudlay ug matinud-anon sa ilang mga buhat ug lihok, sama sa giingon sa ikaduhang pagbasa, dili usab mabug-atan kay sila wala man magpabug-at sa uban. Gantihan sila sa kalingkawasan ug hatag sa ganti nga ilang gipaabot tungod sa ilang matinud-anong paningkamot sa pagpuyo sa kaangayan. Magpabilin unta kita nga matinud-anon ug dili matintal sa haylo sa kasayon ug kahayahay ug puy-an ang pagrespeto sa isigkaingon.

Sa atong pagtak-op sa ordinaryong panahon ug pagpangandam na sa pagpaabot sa Ginoo sa Adbiyento sa mga mosunod nga Domingo, ato untang mapuy-an ang kaangayan. Mamahimo unta kitang buhing saksi sa paghari sa Dios kay siya moanhi sa kalibotan aron mapatunhay ang kaangayan.