Paharia si Kristo Diha Kanimo

Solemnidad sa Kristong Hari sa Uniberso (November 23, 2025)
2 Sm 5:1-3 / Ps 122:1-2, 3-4, 4-5 / Col 1:12-20 / Lk 23:35-43

Giunsa ba nimo pagsabot si Kristo isip Hari? Dili nato malilong nga ang mga Hudiyo sa panahon ni Jesus nga naulipon sa emperador nga Romanhon nangandoy og kalingkawasan. Nagtinguha sila nga maluwas sa kaulipnan ug kahawod sa panggamhanan. Mao nga ang Hari nga ilang gipangandoy mao unta kadtong makapaahon nila sa nasudnon ug politikanhong pagpahimulos.

Apan ang pagkahari ni Kristo labaw pa sa paghari nga nga hawod-haworon niining kalibutan. Ang iyang pagkahari mopalingkawas pinaagi sa pag-alagad sa tanan, sa pagpaubos aron mahaw-as ang maglisod sa ilang kahimtang. Mao gani nga mipasalig siya sa mahinulsulon nga kriminal nga siya makauban Kaniya sa paraiso. Makahinulsol kaha kita ug moila sa panginahanglan nga mobalik kita sa Dios human kita nangawat sa mga gipiyal sa Dios kanato?

Angayan lamang unta natong hinumdoman nga sama nga ang Dios nagluwas sa iyang katawhang Israel gikan sa kaulipnan, unta maamguhan nato nga siya usab nagpahimutang sa matag usa kanato. Dili unta nato hikalimtan nga siya nga Hari maoy nag-andam sa matag usa kanato sukad sa atong pagtuon hangtod kita najatrabaho, sukad sa atong pagnegosyo hangtod nga kita nakapundar, sukad sa pagpangampanya hangtod sa paglingkod. Mahinumdoman mo pa ba giunsa ka niya pag-agak sa panahon nga misangpit ka Kaniya?

Ang paghari ni Kristo dili mao ang pagpalabi sa gahom nga tawhanon, ni ang pagpakita sa pwersang lumalabay. Kondili angay nga magpasalamat kita kay sa iyang pasaylo gihimo kita Niyang angayan nga makaambit sa iyang kabalaan ug kahayag. Siya Mao ang Hari nga magdalag kahiusa ug dili pagkabahin-bahin. Siya mangulo pinaagi sa pagdalag og pagsinabtanay ug dili pagpalawanay. Maamguhan ba nato nga kung miila kita Niya nga Hari kita usab unta instrumento sa kahiusa ug dili pagkatibulaag?

Busa, kita untang tanan uban ni Kristong atong Hari mag-uban sa panaw nga walay mahabilin. Malipay unta kitang tanan nga mangadto padulong sa balay sa atong Dios.