KASIKAS Fun Run Gipahigayon

DUMOY, Davao City — Kapin sa gatusan ka mga managan ang nagtigom sugod pa alas 4:00 sa kaadlawon niadtong Disyembre 13, 2025, sa Villa Josefina sa Dumoy, Davao City, aron motambong sa Fun Run nga usa sa mga aktibidad sa KASIKAS Festival 2025, isip pagselebrar sa ika-21 nga pista sa Parokya sa Sagrada Pamilya. Kini giablihan sa hamubong pag-ampo ug mensahe sa kura-paroko, Fr. Dionisio C. Tabiliran, DCD ug gisundan gilayon sa zumba isip pagpaugnat sa kusog.

Ang kalihukan adunay duha ka kategorya sa lumba, ang 3K ug 5K, nga abli sa mga partisipante sa nagkalain-laing edad. Kadaghanan sa mga managan naggikan sa komunidad sa Holy Family Parish, nga nagpakita sa lig-on nga pag-apil ug panaghiusa sa parokya.

Aron masiguro ang kaluwasan ug kahupayan sa mga partisipante, ang mga boluntaryo gipahimutang sa matag turning point sa dalan aron mohatag og tubig ug wristband. Ang ilang presensya nakatabang sa pagmintinar sa kahapsay ug sa paghatag og suporta sa mga managan sa tibuok ruta.

Ang tanang nakahuman sa lumba gihatagan og sertipiko isip pag-ila sa ilang partisipasyon, samtang ang top three nga mga managan sa matag kategorya gihatagan og cash prizes ug mga plake. Dugang pa niini, adunay mga raffle prizes nga gipanghatag, nga nakapadugang sa kalipay ug kadasig sa mga partisipante.

Sa ngalan sa tigpasiugda, si Mr. Iyong Pepino, namahayag sa iyang dakong pasalamat ngadto sa mga benefactor ug sponsor nga mitabang aron mahimong malampuson ang kalihukan. Samtang ang kura-paroko mipadayag sa iyang pagpasalamat sa tanang miapil sa kalihukan, nga nagpasabot niini isip usa ka mahinungdanong pagpakita sa suporta ug panaghiusa sa mga kalihukan sa parokya.

Ang malampusong Fun Run naghatag og positibo ug madasigon nga pakiglambigit sa KASIKAS Festival 2025, nga nagtimaan sa pagpadayon sa sunod-sunod nga mga kalihukan padulong sa pista sa Sagrada Pamilya. (Flor Arellano-Deloria | Photos by Myla Rocaberte and Karl Sumbeling)