Pormasyon Alang Sa Pundasyon

Gitukod ang bag-ong Formation Team sa Parokya sa Sagrada Pamilya aron mutabang sa pormasyon sa mga miyembro sa GKK ug ministriya. Ang pagtukod sa Formation Team ug ang pagpadaghan sa mga miyembro niini makatabang sa tumong nga mas mapalapad ug mas mapadaghan ang mga katilingban ug ministriya nga mahatagan ug nagkalain-laing gikinahanglang pormasyon.

Niadtong Enero 11 atol sa Kapistahan sa Pagbunyag ni Jesus, gihimo ang pagpadala ug ang pagpanaad sa tanang miyembro sa Formation Team diha sa sulod sa misa sa 8:30 sa buntag nga gipanguluhan sa kura-paroko, Fr. Dionisio C. Tabiliran, DCD.

Sa wala pa nahitabo ang pagpadala sa mga formators, sila nisalmot sa usa ka seminar mahitungod sa stewardship nga gihatag ni Dr. Annierose Villarba niadtong Disyembre 30, 2025 alang sa unang pundok ug niadtong Enero 5 nga gihatag ni Ms. Madelyn Tito alang sa ikaduhang pundok. Ang mga pormasyon nga gitambungan sa mga formators usa ka pagbansay aron mamahimong andam na sa pagpahigayon sa mga sesyon padulong sa mga GKK.

Matod sa kura-paroko atol sa iyang homiliya, iyang gipadayag nga ang mga formators mga maayong piniyalan nga mamahimong instrumento sa Ginoo nga magpadayag sa presensya sa Dios. Hinaot nga pinaagi sa pormasyon, mamahimo ang mga katawhan nga mga maayong sumusunod ni Kristo.

Tumong sa grupo nga sa hinanaling panahon, ang pormasyon mahitungod sa Bibiliya, Liturhiya, GKK ug Pagkapiniyalan mahatag na sa mga GKK hilabi na katong taliabot ang mga kapistahan. Gilauman nga ang tanang parokyano makadawat ug igong pormasyon mga maoy pundasyon sa relasyon sa pakighimamat sa isig-katawo ug sa Dios. (Flor Arellano-Deloria | Photos: Randy Malimban/Myla Rocaberte)