Usa Ka Parokya, Usa Ka Pamilya Nga Nagtuo Ug Nagkahiusa Sa Usa Ka Misyon

Malampuson ug malipayon nga gisaulog sa St. Mary of the Perpetual Rosary Parish, Buhangin ang tinuig nga Parish Family Day uban sa tema nga “One Parish, One Family, One Mission” kaniadtong Domingo, petsa 11 sa bulan sa Enero. Ang kalihokan gipasiugdahan pinaagi sa usa ka Santos nga Misa nga gisaulog alas 10:00 sa buntag, nga maoy sentro ug tinubdan sa panaghiusa sa tanang parokyano isip usa ka pamilya sa pagtoo.

Sa wala pa magsugod ang opisyal nga programa, ang Social Communications Committee (SoCCom) maoy mipahigayon sa registration ug paghatag sa raffle numbers sugod alas 9:00 sa buntag, nga gipangulohan ni Parish SoCCom Coordinator Hermie Mapute uban sa iyang team, aron masiguro ang hapsay ug organisadong dagan sa kalihokan ug gisirad-an ang registration alas onse y media insaktong pagsugod sa programa.

Giablihan ang programa sa pinaagi sa Opening Prayer nga gipangulohan ni Carlita Leone ug Francis Paul Lucas gikan sa Parish Bible Apostolate pinaagi sa Invocatory Dance, nga kabahin usab sa Launching sa Bible Month, nga nagpahinumdum sa kamahinungdanon sa Pulong sa Dios sa kinabuhi sa matag Kristiyano. Misunod dayun ang paghatag og Welcome Remarks ni PSK Coordinator Arsenia Barimbao, nga mainiton nga midawat sa tanang mitambong. Gisundan kini sa Roll Call of Attendance per Zones (Zone 1–10) nga nagpakita sa aktibong partisipasyon ug panaghiusa sa matag zona pinaagi sa ilang yells and cheers. Ug ang pinakauyokan usab sa selebrasyon nga mao ang Lunch Fellowship sa tanan nga mitambong uban sa ilang mga grasyang gipaambit nga gipangulohan ni Ferdinand Gador ang pagpanalangin sa mga pagkaon.

Samtang malipayon sa pagpangaon, nalingaw ug napuno sa kahibalo ang tanan sa Bible Trivia Games nga giandam ni PSP Coordinator Carlita Leone, nga adunay mga premyo nga cash ug in-kind. Ug misunod ang unang bahin sa Raffle Draw alang sa mga consolation prizes.

Human sa pagpaniudto, mipadayag sa ilang talento ang nagkadaiyang zones ug grupo pinaagi sa mga presentasyon sama sa: Zone 1 (sing and dance), Zone 2 ug Zone 3 (dance), SIL Tigatto 8 (sing and dance), ug PSKB Choir (sing).

Usa ka madasigon ug makalingaw nga bahin sa programa mao ang Opening Salvo sa Parish Youth Animators, nga gisundan sa Community Dance kauban ang kabatan-onan, ang Kura Paroko ug mga seminarian, nga lalom nga nakapadasig ug nakapahiusa sa tanang parokyano.

Human niini, gipahigayon ang ikaduhang bahin sa Raffle Draw alang sa minor prizes. Ug misunod sa paghatag ug inspirational and heartfelt message si Rev. Fr. Orlando “Orly” Angelia, nga mipasalamat sa tanang donors and sponsors sa mga raffle items, sa mga GSLs, Pundok Banay, ug sa tanang parokyano sa ilang walay hunong nga suporta sulod sa unom (6) ka bulan niya isip parish priest. Iyang gipahayag nga swerti siya nga na-assign sa parokya, ug nagmalipayon siya uban sa kinatibuk-ang sakop sa parokya, ug iyang gipasiugda nga ang parokya usa ka pamilya diha sa pagtoo.

Mipadayag usab sa ilang talento ang sunod nga mga grupo gikan sa Zone 4 (sing), Zone 5 (Hawaiian dance), Zone 6 (dance), ug GKK Sto. Niño Urban (dance). Gisundan kini sa ikatulong bahin sa Raffle Draw alang sa major prizes. Sa ulahi nga bahin sa programa, gipakita sa Zone 7, Zone 8, ug Zone 9 ang ilang mga sayaw nga nakahatag dugang lingaw ug kadasig sa tanang mitambong. Ang kalihokan misira pinaagi sa Final Raffle Draw alang sa Grand Prize, nga gipaabot ug gikasadyaan sa tanang parokyano.

Malipayon ang 647 ka mga parokyano nga mitambong sa maong panagtapok, ilabi na gayud ang mga nakaswerti sa mga raffle items, nga nahimong simbolo sa panag-ambitay, panagambit sa grasya, ug panaghiusa sa komunidad. Ang Closing Prayer ug Final Blessing gipangulohan ni Rev. Fr. Orlando A. Angelia, Parish Priest, nga nagpasalamat sa Dios alang sa malinawon ug malipayon nga panagtapok.

One Parish, One Family and One Mission. (Arsenio Berdera Jr. – SMPRP GKK SoCCom)