National Bible Month

Gisaulog ang NATIONAL BIBLE SUNDAY sa Parokya sa Sagrada Pamilya pinaagi sa pagpahigayon og Bible Quiz nga adunay duha ka kategorya niadtong Enero 25. Kini gipahigayon aron maaghat ang mga parokyano sa pagtuon bahin sa Bibliya ug masukod ang katakos sa mga pagtulun-an nga adunay kalambigitan sa Bibliya ug pagtoo.

Ang unang kategorya mao ang panagsangka sa matag sona diin ang nidaug alang sa unang ganti mao ang mga partisipante sa Zone 2 nga sila Mrs. Rojean ug Don-Don Galarito kauban ang duha ka batan-on. Ang ikaduhang ganti nakab-ot sa Zone 3, gisundan sa Zone 1 ug Zone 7.

Ang ikaduhang kategorya giapilan sa mga estudyante gikan Bastida Elementary School, Baliok Elementary School, Soledad Duterte National High School, Dumoy National High School, Calasanz de Davao Academy ug St. Patrick’s Math & Science School. Sa 6 ka tulunghaan nga nagsangka, ang unang ganti nakab-ob sa mga representante sa St. Patrick’s Math and Science School, ang ikaduhang ganti nakab-ot sa Calasanz de Davao Academy ug gisundan kini sa Soledad National High School.

Sa laing bahin, gikalipay sa kura-paroko, Fr. Dionisio C. Tabiliran, DCD ang malampuson nga pagpahigayon sa tulo ka gabii nga panagtigom aron paghisgot sa mga topiko nga adunay kalambigitan sa Bibliya. Sa unang gabii ug ikaduhang gabii, gipaambit ni Bro. John Diona, usa ka miyembro sa Catholic Faith Defender gikan sa San Pedro Cathedral ang “Holy Family in the Scripture” ug “The Bible as the Foundation of the Family Life”. Sa ikatulong gabii, gipaambit si Bro. Danny Aperece ang bahin sa “The Mission of the Family.”

Ang maong panagtigom niadtong Enero 20, 22 ug 24 matag alas 6 sa gabii madasigong gitambongan sa mga parokyano sa Sagrada Pamilya. Alang kanila, dako kini og ikatampo alang sa pagtuki sa mga pagtulun-an sa simbahang Katoliko. Lakip usab sa maong sesyon ang pagtubag sa mga mamumulong sa mga pangutana gikan sa katawhan, mga pangutana bahin sa pagtuong Katoliko nga nangita ug dugang pagpasabot ug pagpaklaro.

Si Mrs. Amy Velarde, PSK sa GKK – Our Lady of Guadalupe nipaambit sa iyang pamalandong, nga ang pamilya mao ang pundasyon sa katilingban. Kung ang Bibliya ang himuong basehan ug ang Balaang Pamilya ang himuong sumbanan, ang misyon sa pamilya mahimong mas sayon ug mas makahuluganon.

Sa katapusan, mapasalamaton ang mga nagpasiugda sa maong kalihukan sa positibong pagdawat sa mga parokyano sa mga nakalatid nga mga buluhaton subay sa pagsaulog sa National Bible Month. (Flor Arellano-Deloria, HFP SoCCom Coordinator | Photos: Myla Rocaberte)