One-Time Interest Waiver sa Philhealth Gipatuman, YAKAP Services Gipalig-on

Gipahibalo sa Philippine Health Insurance Corporation (PhilHealth) ang one-time waiver sa interes sa mga wala mabayarang premium contributions, lakip na ang mga bag-ong update sa ilang flagship program nga Yaman ng Kalusugan Program (YAKAP), atol sa Kapehan sa Dabaw ug pagpirma sa Memorandum of Understanding (MoU) tali sa PhilHealth ug Philippine Information Agency (PIA) niadtong Lunes, Pebrero 6, 2026.

Magpatuman ang PhilHealth og one-time waiver sa natigom nga interes alang sa mga employer ug self-employed members nga adunay premium contributions nga wala mabayaran gikan Hulyo 2013 hangtod Disyembre 2024. Tumong sa programa nga matabangan ang mga miyembro nga mabalik sa maayong standing ug masiguro ang padayon nga pag-access sa benepisyo sa PhilHealth.

Sa maong programa, ang interes ra ang i-waive, dili apil ang wala nabayarang premium. Hatagan og usa ka tuig ang mga miyembro aron bayaran ang ilang obligasyon, ug mas dako ang benepisyo kon sayo ang pagbayad:

• Full payment sulod sa 1 ka bulan – walay interes
• Staggered payment (2–6 ka bulan) – 1% nga interes
• Staggered payment (7–12 ka bulan) – 2% nga interes

Sumala ni Germaine M. Tan, Officer-in-charge, Field Operations Division sa PhilHealth XI, gihimo kini tungod sa pinansyal nga kalisdanan sa daghang employer, ilabina atol sa COVID-19 pandemic.

Laumang ipagawas pa sa PhilHealth ang detalyadong giya alang sa employed members, samtang ginahuman pa ang lahi nga guidelines alang sa self-employed.

Gipasiguro sab sa PhilHealth nga ang 21 ka essential medicines ubos sa YAKAP padayon nga available sa tanang YAKAP-accredited facilities sa nasud. Kini naglakip sa tambal alang sa kasagarang mga impeksyon ug chronic diseases sama sa diabetes, hypertension, ug asthma. Gipaandaman usab ang mga partner providers nga magpabiling igo ang supply sa tambal ug taas ang kalidad sa serbisyo.

Sa pagkakaron, adunay 173 ka YAKAP-accredited facilities sa Davao Region.

Dugang pa, gipaila usab ang YAKAP MAPS alang sa mga indibidwal nga maglisod og pangita sa mga pinakaduol nga YAKAP-accredited facilities sa ilang lugar aron mag silbi kini nga giya sa mga katawhan.

Gipahibalo usab sa PhilHealth XI ang pag-uswag sa claims processing. Sumala ni Dr. Marie Allexis F. Camapner, Chief sa Healthcare Delivery and Management Division, ang average claims turnaround time karon anaa sa 23 ka adlaw.

Sukad sa Disyembre 2025, niubos kini ngadto sa 13 ka adlaw. Sa unang bahin sa Enero 2026, naa na kini sa 16 ka adlaw. Sa tuig 2025, anaa sa ₱16 bilyon ang nabayad sa PhilHealth XI sa mga claims. Alang sa YAKAP, ₱447 milyon ang nabayad aron suportahan ang 661,000 ka First Patient Encounters sa tibuok rehiyon.

Padayon ang paningkamot sa PhilHealth XI sa paghatag og mas dali, mas duol, ug mas barato nga serbisyong panglawas alang sa katawhan sa Davao Region. (Kelvin Aguilon)