Paglusad sa Selebrasyon sa Prolife Month

Human sa usa ka semana nga paglusad sa selebrasyon sa Prolife Month sa Archdiocese sa Davao, gilusad usab kini sa Holy Family Parish Baliok pinaagi sa usa ka Santos mga Misa niadtong Pebrero 8 sa alas 5:30 sa buntag. Kini gipanguluhan ni Fr. Dionisio Tabiliran, DCD, kura-paroko sa HFP Baliok. Isip pagpakita sa lig-on nga baruganan alang sa pagpanalipod sa kinabuhi, gitambungan sa nagkalain-laing oraganisasyon ug ministriya inubanan sa mga parokyano ang pag-abli sa Pro-Life Month uban sa tema nga: “Inahan ug anak atimanon, aborsyon dili solusyon.”

Human sa Santos nga Misa, gipahigayon ang pagbendisyon sa Tomb of the Unborn. Tumong sa maong aktibidad ang pagpadayag sa pagpahinumdom sa mga magtutuo mahitungod sa kabalaan sa kinabuhi gikan sa pagpanamkon hangtod sa natural nga kamatayon. Kini usab nagpakita sa hiniusang tinguha nga mapatigbabaw ang dignidad sa matag tawo taliwala sa mga hagit sa modernong panahon.

Sumala sa pamahayag sa mga kadagkuan sa maong mga organisasyon, apostolado ug ministriya, ang Pebrero dili lamang bulan sa gugma alang sa mga magtiayon, apan bulan usab kini sa pagpasalamat sa gasa sa kinabuhi nga gikan sa Dios. Adunay usab mga espesyal nga mga pag-ampo sa mga inahan nga nagsabak, ug mga kalihukan sa komunidad nga ipahigayon sulod sa parokya aron mapalapdan ang kahibalo sa mga parokyano mahitungod sa mga isyu nga naghulga sa kinabuhi. Pinaagi sa mga nakalatid nga aktibidad sa tibuok bulan sa Pebrero, gidapit ang tanang parokyano sa pagsuporta ug pagsalmot niini alang sa malukpanong lihok sa pagprotekta sa kinabuhi.

Ang kalihukan gipangunahan sa Family & Life Apostolate ug sa mga Pangulo sa Kristohanong Banay (PSKB), uban sa suporta sa Daughters of Mary Immaculate (DMI), Catholic Women’s League (CWL), ug uban pang mga pundok. (Dan-Dan S. Catipay, FLA, Holy Family Parish, Baliok)