Ayaw Pagpabiling Buta

Ika-4 Domingo sa Kwaresma (March 15, 2026)
1 Sm 16:1, 6-7, 10-13 / Ps 23:1-3, 3-4, 5, 6 / Eph 5:8-14 / Jn 9:1-41

Dili ka ba buta nga makakita ka sa kaayo sa uban ug sa kaayo sa Dios kanimo? Kinsa ba ang buta? Kanus-a ba ang tawo buta?

Kadtong mahukmanon nga binase lamang sa anaa sa gawas sa usa ka tawo maoy buta. Apan ang Dios, diha sa unang pagbasa, nagtan-aw sa kasing-kasing. Ang mahukmanon kutob lamang sa makita sa panggawas. Ang iyang pantan-aw dili molapos sa kinahiladman. Ang uban kanato usahay kung ang hitsura o sininaan sa uban pinobre dili gani ta dayon motagad. Apan kung maayo ang postura ug sinaw ang sakyanan, gilayon kita moabi-abi. Usahay gani kung dili aktibo sa simbahan ug kung medyo strikto og dagway molingiw kita, apan kung siya nag-alagad ug sayon duolon dali ra kita nga mopahiyom kaniya.

Ang nagdumili sa pagbuhat sa angay untang buhaton buta. Apan ang anak sa kahayag, sumala sa ikaduhang pagbasa, nagbuhat sa kaayo ug kamatinud-anon. Kung nagbuhat kag panikas ug pangawkaw, huna-hunaa nga kanang gibuhat nimo sa tago nakita na sa Ginoo. Kung naghuna-huna ka nga abi kay wala nasayod ang imong asawa o bana o anak sa imong bisyo luwas ka. Hinumdomi, dayag ang tanan mata sa Ginoo. Busa wala gayod kay ikatago atubangan sa Dios. Mas maayo nga dili ka maniguro lamang sa imong kalipay, kondili sa unsay makaayo sa kadaghanan. Busa pilia ang mga buhat nga tarung, ug likayi ang mga buhat sa kangitngit aron dili ka magpabilin nga buta.

Ang nangita sa sayop ug pagkulang sa uban buta. Ang hinungdan ngano nga dili dayon makatuo ang mga Pariseyo nga naayo ang buta, diha sa Ebanghelyo, tungod kay nangita silag sayop kaniya. Nangita usab silag sayop sa nag-ayo kaniya nga mao si Jesus. Wala silay pagtuo Kaniya. Kung sa lantaw nimo sayop ang uban ug ikaw kanunay sakto, basig usa ka ka buta. Kung nagsige ka lang og basol sa uban nga tungod nila dakong mali ang ilang gihimo ug ikaw sakto, basig ikaw ang buta. Kung namahid ka lang kanunay sa lapok ug baho ngadto sa uban kay alang kanimo limpyo ug humot ka atubangan sa mga tawo, tingalig nabuta ka sa imong garbo o kahakog o bakak. Kung wala ka nay nakita nga kaayo tingalig ikaw nabuta na.

Niining panahon sa Kwaresma, si Jesus moabli unta sa atong mga mata sa atong kasing-kasing. Makakita unta kita unsa ka mangitngit ang sala, ug mahupay sa kahayag nga dala ni Kristo. Mobangon unta kita gikan sa kangitngit sa tanang dili maayo nga atong nahimo, ug maandam sa pagsaulog sa Pasko sa Kahayag diha sa Pagkabanhaw sa Ginoo.