March for Life 2026 Alang sa Pagpanalipod sa Kinabuhi

Sa padayon nga pagpalig-on sa kultura sa kinabuhi, ang Knights of Columbus sa Archdiocese of Davao nagpahigayon sa ilang tinuig nga “March for Life” niadtong Marso 14, 2026, nga nagtigom sa mga miyembro sa lain-laing Catholic organizations ug mga layko aron magpakita sa ilang panaghiusa sa pagpanalipod sa kinabuhi.

Ang kalihokan kabahin sa misyon sa Knights of Columbus sa pagpasiugda sa kasagrado sa kinabuhi ug pagpalig-on sa adbokasiya batok sa aborsyon, pinaagi sa malinawon nga martsa ug pag-ampo sa komunidad.

Sa kaadlawon pa lamang, nagtigom na ang mga partisipante sa Roxas Avenue, duol sa Ateneo de Davao University, diin nagsugod ang martsa alas 6:00 sa buntag. Gikan didto, miagi ang panaw sa Ponciano Reyes Street, miliko sa Bonifacio Street, ug nagpadayon padulong sa San Pedro Cathedral diin gipahigayon ang Santos nga Misa sa alas 7:30 sa buntag.

Ang martsa gipahigayon inubanan sa espiritu sa pag-ampo ug panaghiusa, uban sa mga banner ug mensahe nga nagpasiugda sa pagrespeto sa kinabuhi gikan sa pagpanamkon hangtod sa natural nga kamatayon.

Human sa martsa, ang panon nagtapok sulod sa simbahan sa San Pedro Cathedral alang sa mubong programa diin ilang gipaminawan si Rev. Fr. Orlando Angelia, Family and Life Apostolate Director, sa iyang pakigpulong bahin sa importansya sa kinabuhi gikan sa sabakan sa usa ka inahan.

Mga Puntos sa Homiliya

Sa iyang homiliya sa misa, gipasiugda ni Msgr. Paul A. Cuison nga ang kinabuhi usa ka sagrado nga gasa gikan sa Dios ug dili kini angay balewalaon o pasipalahan. Gipasabot niya nga ang pagpanalipod sa kinabuhi dili lamang usa ka adbokasiya kondili usa ka responsibilidad sa matag Kristiyano.

Iyang gihagit ang mga tumutuo nga mahimong tinood nga tigpanalipod sa kinabuhi, dili lamang pinaagi sa mga martsa ug kalihokan, kondili pinaagi sa pagpakita sa kaluoy, pag-amuma sa mga mabdos nga inahan, ug pagtabang sa mga pamilyang nanginahanglan.

Gipahinumdoman usab niya nga ang kultura sa kinabuhi magsugod sa pamilya ug komunidad, diin ang pagrespeto sa dignidad sa matag tawo kinahanglan ipakita sa adlaw-adlaw nga kinabuhi.

“Ang paglakaw nato karon dili lamang pisikal nga panaw,” matud pa niya, “kundi usa ka paglakaw sa pagtuo ug pagbarug alang sa kamatuoran nga ang matag kinabuhi bililhon sa atubangan sa Dios.”

Panaghiusa sa Komunidad

Ang kalihokan gisuportahan sa mga miyembro sa lain-laing Catholic lay organizations ubos sa ACLAIM o Archdiocesan Council of the Lay Apostolate and Integrated Movements, uban sa mga parishioners, kabatan-onan, ug mga lider sa Simbahan nga naghiusa sa pag-ampo ug pagpamatuod sa ilang pagtuo.

Alang sa Knights of Columbus, ang March for Life nagpadayon nga usa ka makahuluganon nga pagpamatuod sa pagtuo sa komunidad sa Katoliko sa Davao, nga nag-awhag sa tanan sa pagtinabangay sa pagtukod sa usa ka katilingban nga nagrespeto ug nag-amuma sa bililhong gasa sa kinabuhi. (Rowena Baldoza Villaflor, SoCCom, OLLP)