Hiniusang Pagpangandam sa Semana Santa

Malampusong gipahigayon ang Lenten Recollection sa Holy Family Parish niadtong Marso 21 sa alas sais sa gabii nga gipangunahan ni Rev. Carlo Panaguitan, SDV. Daghang mga parokyano ang mitambong ug aktibong miapil sa maong espirituhanong panagtigom.

Ang rekoleksyon adunay tema nga, “Renewed & Resurrected: A Journey Towards Jesus Christ.”

Usa sa gihatagan ug duso mao ang pagbalik-lantaw nga bisan pa sa daghang bahandi ug kalipay nga atong natagamtaman dinhi sa kalibutan makasinati gihapon kita ug kakulang ug kalaay tungod kay ang Diyos lamang ang makapuno sa kahaw-ang sa atong kasingkasing. Gipahinumduman usab ang mga magtutuo nga isip tawo, dali ra kapuyon sa mga kabug-aton ug hagit sa kinabuhi, apan ang Ginoo dili gayud kapuyon. Busa, gitawag kita sa pagbag-o ug pagpalig-on sa atong relasyon sa Diyos, nga mao ang tinubdan sa kahayag ug kusog.

Niadtong Marso 24, pipila ka adlaw human sa pagpamalandong, gipahigayon ang kumpisalan sa parokya. Kini usa ka balaang buluhaton nga naghingpit sa mga magtutuo sa pakig-uli sa isigkaingon ug sa Ginoo nga maoy naglalang kaniya. Kini usab timaan sa paghinulsol sa mga kalapasan nga nabuhat ug pagpangayo sa grasya sa Diyos alang sa kalinaw sa hunanuna ug kasingkasing.

Sa laing bahin, nagkahiusa usab ang mga parokyano alang sa Bayanihan sa Parokya niadtong Marso 23. Kini pag-andam sa simbahan alang sa pagsaulog sa Semana Santa. Lakip sa buluhaton mao ang pag-andam sa lugar sa bihilya,pagpanglimpyo sa palibot lakip na ang atubangan sa simbahan. Ang limpyo ug nindot nga palibot makatabang sa paghatag ug himaya sa Diyos ug makahatag ug inspirasyon sa pagpalandong.

Pinaagi sa paggahin ug panahon sa espirituwal ug pisikal nga pagpangandam, ang matag usa makabaton ug mas makahuluganon nga pagsaulog sa Semana Santa. (Flor Arellano-Deloria | SoCCom, Holy Family Parish, Baliok)