Hiniusang Kasaulogan Sa Diosnong Kalooy

Ang Kasaulogan sa Diosnong Kalooy o Divine Mercy Sunday gisaulog matag unang Dominggo human sa Pasko sa Pagkabanhaw (Easter Sunday), nga nagtapos sa Oktaba sa Pasko sa Pagkabanhaw. Kini usa ka adlaw sa grasya diin ang Ginoo nagsaad og hingpit nga kapasayloan ug silot alang sa mga kalag nga moduol Kaniya. (Diary 699)

Ang debosyon sa Diosnong Kalooy naggikan sa mga pagpadayag ni Hesus ngadto kang Santa Faustina Kowalska, (Secretary of Mercy), usa ka Polish nga madre. Si Hesus miingon kang Sta. Faustina nga ang katawhan dili makabaton og kalinaw hangtod nga dili sila modangop sa Iyang Kalooy. Kini nga adlaw nagpahinumdom kanato nga ang Dios mahigugmaon ug andam mopasaylo, bisan unsa pa kadako ang atong sala. Gipadayag ni Hesus ang iyang tinguha nga ang Kalooy sa Diyos pasidungggan ug isaulog sa tibuok kalibutan.

Giawhag ang tanang mga magtutuo, mga nagdebosyon sa Diosnong Kalooy aron makuha ang mga saad sa grasya niining adlawa nga mohimo niining mga mosunod: PAGKUMPISAL o pagdawat sa Sakramento sa Pagkumpisal, PAGDAWAT SA LAWAS NI KRISTO sa adlaw sa Kasaulogan, PAGPASIDUNGOG SA IMAHEN o Pag-ampo atubangan sa hulagway sa Diosnong Kalooy (Jesus, I Trust in You/Hesus, Nagasalig Ako Kanimo), PAG-AMPO SA CHAPLET OF DIVINE MERCY o Rosaryo sa Diosnong Kalooy ug ang PAGBUHAT SA KALOOY (CORPORAL WORKS OF MERCY): Pagpakita og Kalooy sa isigkatawo.

Ang Kasaulogan sa Kapistahan sa Diosnong Kalooy sa Archdiocese of Davao magsugod kini sa Novena Mass Pilgrimage sa unom (6) ka mga Parokya dinhi sa Davao. Ang una hangtod ikatulong Adlaw sa Novena ipahigayon kini as Individual Novena Only, tungod sa awhag sa atong Arsobispo sa Davao nga ang tanang mga magtutuo kinahanglan gayud nga molambigit sa Universal Celebration sa Simbahan nga mao ang Paschal Triduum Celebration. Busa, ang Novena Mass Pilgrimage nagsugod sa adlaw’ng Lunes, 4th day, Abril 6, 2026, sa San Antonio de Padua Parish Agdao, Martes, 5th Day, Abril 7, 2026, sa San Pedro Cathedral, Miyerkules, 6th Day, Abril 8, 2026, sa Our Mother of Perpetual Help Parish (Redemptorist), Bajada, Huwebes, 7th Day, Abril 9, 2026, sa St. Francis Xavier Parish, Tibungco, Biyernes, 8th Day, Abril 10, 2026 sa St. Mary of the Perpetual Rosary Parish, Buhangin, Sabado, 9th Day, Abril 11, 2026, sa Ascension of the Lord Parish, GSIS Hgts., Matina.

Gisaulog ang Misa sa Kasaulogan sa KAPISTAHAN SA DIOSNONG KALOOY sa San Pedro Cathedral, Abril 12, 2026, alas 3:00PM sa hapon uban sa Tema: “DIVINE MERCY: HEALER OF A BROKEN WORLD.” Ang atong Arsobispo sa Davao, Most Rev. Romulo G. Valles, D.D., mao gayud ang mangulo niini uban sa mga kaparian sa Archdiocese of Davao. Pagasundan kini sa PROSISYON sa alas 4:00PM sa hapon, diin ang tanang mga magtutuo/deboto giawhag sa pagsalmot sa maong kalihukan.

Mabungahon ug malipayong pagsaulog sa Kapistahan sa Diosnong Kalooy. DIVINE MERCY: JESUS, I TRUST IN YOU. (Sylvia Orbeta)