Team Building sa GKK Virgen Del Pilar Gipahigayon

Malipayong nagkatigom ang mga GSLs ug ang pipila ka mga batan-on didto sa usa ka nindot nga resort sa Inawayan, Toril nga nailhang Midori. Kini nahitabo niadtong Abril 16.

Ang maong panagtapok nagtimaan sa panaghiusa ug panagsuod sa mga GSLs ug mga batan-on aron mas mahimong lawom ang panaghigalaay ug panag-igsuunay. Nabati gayod sa matag-usa ang kalipay pinaagi sa paghimo ug mga aktibidad sama sa mga padula, pag-inambitay sa mga balon ug panag-istorya-istorya.

Gani, usa sa mga partisipante nakaingon nga dako iyang pasalamat kay bisan sa mubo nga higayon nakalimot siya sa iyang mga problema. Kini nagpasabot nga ang team building sa kalitingban ug kapilya gikinahanglan usab aron makaginhawa ang naay mga bug-at nga gibati ug aron masinati ang kinaiya sa mga kaubanan gawas sa kapilya ug sa katilingban.

Tumong sa aktibidad nga mag-uban ang mga GSLs ug ang mga batan-on sa GKK aron magkailhanay. Pinaagi niini, mahimong sayon ug gaan ang mga buluhaton sa GKK. Kini usab makahatag ug inspirasyon nga isip mga GSLs, maggahin usab kita ug panahon nga maglingaw-lingaw, magsadya ug magpasalamat. Gipakita usab sa maong panagtapok ang pagkamaginhatagon kay dili magmalampuson ang aktibidad kung walay pag-inambitay, pagsinabtanay ug suporta sa matag-usa.

Sila nanghinaot nga masundan pa ang aktibidad mga sama niini aron makapadasig sa mga miyembro sa GKK. (Rosemarie Lucero, GKK SoCCom, VDP, Holy Family Parish, Baliok)