Kahiusa Diha Sa Pagkadaiya

Domingo sa Pentecostes (May 24, 2026)
Acts 2:1-11 / Ps 104:1, 24, 29-30, 31, 34 / 1 Cor 12:3-7, 12-13 / Jn 20:19-23

Duna kitay puruhan nga magbuot sa uban aron magpareha kitang tanan. Duna kitay kinaiya nga kontrolon ang uban aron mahisama sa atong sininaan o batasan. Apan ato usahay nga nalimtan nga ang gasa sa Espiritu Santo nagtugot sa panaglahi diha sa paningkamot sa panaghiusa.

Sa unang pagbasa, ang nadawat nga Espiritu Santo sa mga tinun-an, nagtugot sa lain-laing pinulongan nga nagsangyaw sa mga gamhanan nga buhat sa Dios. Wala sila nagkaguliyang bisan lahi-lahi ang ilang pinulongan. Sa samang kahimtang, bisan unta sa lahi-lahi nato nga kultura, sinultihan o kagikan, kung ang atong mga huna-huna ug tumong mao ang pagpahari sa kaayo sa Ginoo sa matag usa kanato, makab-ot ra gihapon nato ang panaghiusa. Kung ang ipalabi mao ang pagka-ginasahan ug pagka-gigrasyahan natong tanan sa Dios, ug dili ang pagpadato ug pagpaharuhay sa kaugalingon, dili halayo kanato ang pagkahiusa.

Sa ikaduhang pagbasa, gipahimangnoan ni San Pablo ang Kristohanong katilingban nga maoy usa ka lawas ni Kristo. Ang usa ka lawas dunay lain-lain bahin nga molihok sa iyang ikatampo alang sa usa ka lawas. Ang maong hagit gipahamtang kanato karon nga unta ang lahi-lahi nato nga talento o kapasidad ato unta nga magamit dili sa limitado nga pagpauswag sa kaugalingon lamang, kondili sa tibuok katawhan sa Dios. Kung malingkawas lang unta ang matag usa sa pagpabusog ug pagpabuhong lamang sa kaugalingon ug molihok aron makapalipay ug makapaayo sa tanan, nan mabuhi gayod ang Espiritu Santo nga maoy makapahiusa sa lawas.

Ug sa Ebanghelyo, gidasig kita nga taliwala sa riyalidad sa panagbingkil, ang Ginoo nagapasaylo aron maangkon ang panag-uli ug panaghiusa. Kung mamati lang unta kita sa Espiritu nga mao ang Ginoo, mahitsas gayod kita pagpasalo nga magdala sa tunhay nga panaghiusa. Inay pagdumot ug panimalos ang magpasulabi, modawat unta kita sa Espiritu sa pagpaubos ug pag-alim sa mga samad sa garbo ug kahakog aron mopatigbabaw ang pagsinabtanay ug kalinaw.

Niining pagsaulog nato sa Pentekostes, makapabag-o unta sa matag usa kanato ang Espiritu Santo nga ipadala sa Dios. Mabag-o unta kita ug mahiusa diha sa pagkadaiya.