33rd Parochial Fiesta gisaulog sa San Isidro Labrador-Lumondao

Malipayon nga nagsaulog ang Parokya sa San Isidro Labrador Lumondao sa ika treyntay tres nga kapistahan ug usab ang unang tuig nga anibersaryo ni Rev. Fr. Efren Gubac, Jr. isip Kura Paroko uban sa Parochial Vicar nga si Rev. Fr. Jupiter Morales. Bisan pa sa kalisod na nasinati sa tanan karong mga panahona.

Niining tuiga gibahin sa tulo ka adlaw ang mga dagkong aktibidad. Niadtong May 14, 2026 gipahigayon ang prosisyon sa kadalanan sa Lumondao nga gitambongan sa singkwentay dos ka mga GKK dala ang imahe sa nagkadaiyang patron. Human sa prosisyon gisunod gilayon ang Santos nga Misa sa ikasiyam nga Novena. Sa pagkahapon gisugdan dayon ang Elimination Round sa Volleyball for Women alang sa mga babayeng pangulo.

Sa Mayo 15, 2026 Adlaw sa Kapistahan gipahigayon ang Santos nga Misa nga gipanguluhan sa atong Halangdong Arsobispo Romulo G. Valles D.D. Bisan pa sa maulan nga panahon, wala kini nahimong babag sa pagtambong sa mga parokyano sa Santos nga Misa. Gidayeg ni Archbishop Valles ang Music Ministy-SILP Rondalla tungod sa maanindot nga mga tugtog pinaagi sa paggamit lamang ug gitara. Dugang pa niya maanindot gayod ang binisaya nga mga awit. Gidayeg usab niya ang paglambo sa Sanctuario sa Parokya.

Ang homiliya ni Archbishop Muloy nakasentro sa Yukaristiya diin matud pa niya nga kini mao ang katapusang gihimo sa Dios sa Iyang kalibutanon nga kinabuhi. Matud pa niya nga ang tanan natong mga sakripisyo, problema o mga kabug-at sa kinabuhi atong ihalad dinha sa Santos nga Misa sama sa pag-ampo ug pagtambong ni San Isidro sa Misa sa dili pa siya motrabaho. Dugang pa niya nga ang pagpangalagad o pagka pangulo dili nagdepende sa degree kondili sa kasingkasing ug hunahuna nga abli sa pagsunod kang Kristo. Aduna gayoy mga bug-at nga Krus apan magmalipayon kita kay si Kristo misaad nga ubanan kita Niya hangtod sa kahangtura ug nga ang Dios magauban kanato sa tanang higayon.

Human sa Santos nga Misa adunay simpleng salu-salo, mubong programa ug mga padula nga gidumala sa mga kabatan-onan sa Parokya.

Ang ikatulong bahin mao ang 2nd Invitational Enduro Trail Challenge for a Cause nga gipahigayon niadtong May 17, 2026 sa likod nga bahin sa Parokya. Kini nga aktibidad alang sa pagpalambo sa atong simbahan nga gitambungan sa mga nagkalain lain enthusiast nga magmotorsiklo.

Mapasalamaton ang mga parokyano sa San Isidro Lumondao sa mga bisita nga sir Rev Fr. Danilo Dotollo, Parochial Vicar Holy Family Baliok sa iyang pakig-uban kanamo sa pagsaulog sa kapistahan ug usab sa pagsalmot ni Rev. Fr. Alfredo Bustamante, Parochial Vicar sa St. Jude Parish sa Enduro Trail Challenge for a Cause. Gidayeg ug gipasalamatan namo ang Dios sa malampuson ug zero casualty sa Enduro Trail Challenge.

VIVA SR. SAN ISIDRO LABRADOR! VIVA!

(By Echerica U. Yamba | SILP Parish Soccom Coordinator)