Santissima Trinidad sa Pakig-uban, Pagdasig ug Kaluwasan

Solemnidad sa Balaang Trinidad (May 31, 2026)
Ex 34:4-6, 8-9 / Dn 3:52, 53, 54, 55, 56 / 2 Cor 13:11-13 / Jn 3:16-18

Niining Domingo sa Santissima Trinidad, ang USA ka Dios sa kahiusa sa Amahan, ug Anak ug Espiritu Santo, gisaulog nato sa Pilipinas, ang Domingo sa mga Gagmayng Kristohanong Katilingban (GKK). Unsa bay kinaiya sa sa USA ka Dios sa kahiusahan sa Amahan ug Anak ug Espiritu Santo nga angay natong kapanaminan sa pagkinabuhi sa GKK? Naamguhan ba nato nga ang Dios buot nga sama kaniya magpuyo kita sa pakig-uban dili sa pagbiya, sa pagdasigay dili sa pagpapukan, ug sa pagluwas dili sa paghukom.

Pakig-uban dili pagbiya. Ang pagsaka sa langit ni Kristo wala magpasabot nga gibiyaan kita niya. Nagpasabot hinuon kini nga giubanan kita niya kinsa atua na langit. Ang iyang pakig-,uban diha sa paagi sa presensiya sa Espiritu Santo. Kining maong pakig-uban sukad pa sa panahon Moises. Nadungog nato sa unang pagbasa nga ang Ginoo mikunsad nga gilibotan sa panganod ug miitok sa iyang ngalan. Si Moises, sa pag-agi sa Ginoo, diha sa iyang pagsalig mihangyo nga bisan sa, kagahig ulo sa katawhan ang Ginoo makig-uban kanila. Sa atong pamilya o katilingban o nasod, naningkamot ba kita nga ubanan ang mga gahig ulo? Unsaon mo ba pagpasensiya nga makig-uban ug maminaw niadtong mga problemado?

Pagdasigay dili pagpapukan. Si San Pablo, sa ikaduhang pagbasa, nagpahimangno sa pagpuyo isip katilingban samag kinaiya sa Ginoo. Siya nag-awhag sa pagdasigay ug dili ang pagpapukan. Sa pangandoy sa pagbag-o, siya nagdapit sa mga magtutuo dili sa pagdautay ug sa pagpangitag sayop, kondili pag-agak diha sa pag-uyonay sa usag usa, sa pagbinatiay sa kalinaw. Sa atong pamilya o katilingban o nasod, nahimo ba kita nga mopahid sa atong lapok ngadto sa uban o sa pagtabang sa paghinlo? Unsaon mo ba pagdasig sa kaayo sa usag usa aron mapagaan ang tensiyon sa kaguliyang?

Pagluwas dili paghukom. Ang hinungdan nganong gipadala sa Dios sa kalibotan ang iyang bugtong Anak dili ang pagsilot, kondili sa pagluwas. Tungod sa iyang dakung gugma sa tanan, ang Dios nagluwas ug wala misilot o milaglag sa kalibotan. Pinaagi sa pagdapit diha pagtoo kaniya, Siya mitukod pag-usab sa nahisalaag niyang mga anak. Sa atong pamilya o katilingban o nasod, gibati mo ba ang pagsilot o ang pagluwas? Unsa bay imong mahimo aron inay pagsilot, mohari ang pagluwas ug pagtukod sa nalunod nga nasod?

Hinaot nga ang tagsa-tagsa nato ka GKK mamahimong salamin sa Dios nga makig-uban ug dili mobiya, modasig ug dili mopukan, moluwas ug dili mosilot. Alang sa usa ka Dios sa kahiusa sa Amahan ug Anak ug Espiritu Santo, ang matag GKK makahatag unta og himaya ug pagdayeg sa kahangturan.