Kita ang Iyang Katawhan

Ika-11 nga Domingo sa Ordinaryong Panahon (June 14, 2026)
Ex 19:2-6 / Ps 100:1-2, 3, 5 / Rom 5:6-11 / Mt 9:36-10:8

Usahay dili na nato mabati nga dunay kalooy ilabina sa mga anaa sa posisyon karon. Mabati hinuon nato ang pag-abuso sa nahuptan nga gahum. Tungod niini, daghan ang nahisalaag inay sa hustong dalan makakaplag. Mas maayo nga pamalandongan nato unsay gihimo ni Jesus, unsay iyang kinaiya atubangan sa katawhan nga gisalig sa Amahan kaniya.

Naluoy siya, dili kay walay puangod. Kini ang gibati ni Jesus sa dihang namatikdan niya nga ang mga pangulo sa iyang katawhan namintaha kanila ug wala na nag-atiman sa panginahanglan sa ilang ginsakpan. Iampo nato ang atong mga lideres aron mobati unta silag kalooy ug puangod atubangan sa kahimtang sa kalisod sa katawhan karon. Mabati unta sa mga pangulo ang ubos nga kahimtang sa katawhan ug ila untang matabangan ang mga yano ug naglisod sa katilingban.

Gihatagan niya silag gahum, dili kay giabuso niya ang gahum. Namati ug misalig si Jesus sa iyang mga tinun-an. Mitubo sila pagdumala kay wala man siya nag-abuso sa iyang gahum. Gipaambit hinuon niya ang iyang gahum aron sila makabarog sa angay nga buhaton sumala sa ilang misyon. Manghinaot kita nga ang mga pangulo makalikay sa tintal sa pag-abuso sa gahum nga ilang nahuptan. Makalingkawas unta sila sa tintal sa pag hawod-hawod ug magpuyo hinuon sa tiunay nga pagkaalagad. Dili unta sila mamintaha, kondili moserbisyo nga tinud-anay.

Gipadala niya sila alang sa mga nahisalaag, dili kay mao hinuon ang magpahisalaag. Gituyo ni Jesus nga unahon pagsangyaw ug kabigon una ang mga sakop sa iyang katawhan, aron maandam sila ug malig-on sa misyon sa gawas sa iyang panon. Buot niya nga sila makapasabot ug makapahiusa sa kinsay duol kanila sa dili pa ang uban. Mangaliyupo kita nga ang mga pangulo makakabig unta sa ilang ka trabaho ug kauban sa lungsod ug dili mahimong dautan nga impluwensiya sa pagkabulag-bulag. Wala untay bakak o garbo ang mopatigbabaw, kondili ang pagpaubos ug tininuod nga kalinaw ug kahiusa alang sa pagkaplag sa sa kadaghanan sa hustong dalan.

Isip sumusunod ni Kristo, gitahan niya ang tanan alang kanato bisan sa atong pagka dautan. Hinumdoman nato nga ang Ginoo nag-angkon, nanalipod ug nagluwas kanato. Busa malipay kita nga moalagad ug magmasinugtanon kaniya. Kita ang iyang katawhan, ang mga karnero sa iyang panon.