Kulminasyon Halad Pahinungod Kang Santa Maria

Malampusong gipahigayon ang Flores de Mayo Culminating Activity sa parokya niadtong Mayo 30, 2026. Nagsugod ang selebrasyon pinaagi sa Santos nga Misa alas 2:00 sa hapon nga gipanguluhan ni Rev. Fr. Dionisio Tabiliran.

Malipayon nga naghalad og mga bulak ang mga kabataan ngadto kang Birhen Maria isip simbolo sa ilang gugma ug debosyon sa Inahan ni Hesus, atong Manluluwas. Gisundan kini sa usa ka prosesyon libot sa simbahan padulong sa parish pavilion diin gipahigayon ang programa.

Usa sa mga highlights sa kalihukan mao ang choral presentation gikan sa matag sona. Ang piyesa nga gisulat ni Fr. Diony naghisgot sa mga hiyas ni Maria isip atong inahan nga usa ka tinuod nga ehemplo sa Kristohanong pagtuo.

Dako ang kalipay sa mga ginikanan sa paghatag ug bililhong kasinatian sa mga kabataan sa parokya. Mapasalamaton sila sa mga katekista nga nagtahan sa ilang kaugalingon aron paghulma sa mga kabataan. Ang presensya sa mga pari, Fr. Diony Tabiliran ug Fr. Danny Dotollo nakapadasig usab sa mga kabataan sa pagpadayon sa pagtambong sa Flores de Mayo.

Daghang salamat sa tanang mga Servant Leaders sa walay puas nga pagsuporta sa mga kabataan sa matag GKK. Hinaot nga kining mahinungdanong kalihukan magdasig sa matag usa nga mahimong mas duol kang Hesus pinaagi kang Maria. (Flor Deloria)