173 ka mga Tumutuo Midawat sa Sakramento sa Kumpirma

Hunyo 6, 2026 | Malampusong gipahigayon sa parokya sa San Juan Pablo Segundo, Los Amigos ang Sakramento sa Kumpirma diin 173 ka mga gipangkumpirmahan ang midawat sa maong Sakramento.

Gipanguluhan ang maong selebrasyon sa atong halangdong Arsobispo sa Dabaw Most Rev. Romulo G. Valles D.D., nga naghatag ug makapadasig nga mensahe mahitungod sa paglig-on sa pagtuo ug pagpadayon sa pag-alagad sa Ginoo. Gidasig usab niya ang mga bag-ong gipangkumpirmahan nga mamahimong ehemplo sa pagkamatarong, pagkamabinuligon, ug aktibong partisipasyon sa Simbahan.

Sa iyang homiliya, iyang gipadayag ang importansya sa Espiritu Santo sa kinabuhi sa matag Kristohanon ug ang responsibilidad sa mga bag-ong gipangkumpirmahan nga mahimong buhing saksi ni Kristo pinaagi sa ilang mga pulong ug binuhatan. Ang mahinungdanong kalihukan gitambongan sa mga ginikanan, ninong ug ninang, uban sa tibuok komunidad sa parokya nga nagpakita sa ilang kalipay ug suporta sa mga gipangkumpirmahan.

Nagpadayag usab sa iyang pagpasalamat ang Pangulo sa Panudlo kon PSP Coordinator, Mrs. Marichu Bibat sa tanang mga Katekista nga nagtabang ug naglihok aron mahapsay ug maglamapuson ang maong aktibidad. Dugang niini, naghatag usab siya ug mensahe alang sa mga gipangkumpirmahanan, “Alang sa tanang mga gipangkumpirmahan nga diha sa ilang matag adlaw nga kinabuhi ilang mapuy an ang gasa sa espirito Santo ug nga unta mapadayunon silang magkat-on ug mag puyo ug mamahimo silang saksi sa pagtuo, paglaum ug gugma ngadto sa uban.” Ang iyang mensahe nahimong inspirasyon ug giya alang sa mga bag-ong gipangkumpirmahan aron ipadayon ang ilang espirituhanong panaw uban sa pagtuo ug pag-alagad.

Sa kinatibuk-an, ang maong selebrasyon sa Sakramento sa Kumpirma nahimong usa ka malipayong okasyon nga naghatag inspirasyon ug paglaum sa tanang mga tumutuo nga mitambong niini. (St. John Paul II Parish SoCCom)