HOPE BIJAS: Humanitarian Relief Campaign gipahigayon sa Archdiocese of Davao

Naglunsad ang Archdiocese of Davao sa Humanitarian Relief Campaign 2026 aron makatabang sa mga residente sa Balut Island ug Jose Abad Santos nga naapektuhan sa magnitude 7.8 offshore earthquake niadtong Hunyo 8, 2026.

Ang maong inisyatiba gidala ubos sa HOPE BIJAS o Helping Our People in Emergencies in Balut Island and Jose Abad Santos, nga nagtumong sa paghatag og dali nga hinabang sa mga biktima sa kalamidad.

Nagsunod ang kampanya sa panawagan ni Arsobispo Romulo G. Valles, D.D., Arsobispo sa Davao, pinaagi sa iyang circular letter nga nag-awhag sa mga parokya, GKK, Katolikong eskwelahan, relihiyosong komunidad, ug mga magtotoo nga magpakita og pakighiusa pinaagi sa paghatag og donasyon alang sa mga naapektuhan.

Sa unang hugna diin nahatag ang mga donasyon kaniadtong Hunyo 20 gihatod ang ciento singkuwenta ka mga food packs nga naglakip sa lima ka kilo nga bugas, unom ka lata sa canned goods, unom ka sachet sa noodles, usa ka kilo nga brown sugar, duha ka dosena nga coffee sticks, ug tunga sa kilo nga asin ug apil usab niana ang setentay singko ka gallon sa tubig, ug kuwarentay uno ka tagsa ka mga trapal.

Gipangulohan ang maong relief initiative sa Archdiocesan Social Action Center o ASAC ubos sa pagdumala ni Rev. Fr. Leonardo A. Dublan,Jr., ASAC Director, diin ang mga gustong motabang pinaagi sa donasyon gitambagan nga ihatud kini sa ilang tagsa-tagsa ka Parish Office o sa San Pablo Parish nga gitudlo isip opisyal nga drop-off center.

Kaniadtong Hunyo 22, 2026 pinaagi sa usa ka zoom meeting gipahigayon uban ang Caritas Ph ug DADITAMA Sub-Humanitarian Team diin nahisgotan ang situational report sa Balut Island. Gipahigayon usab ang mga Key Activities sama sa Rapid Needs and Damage Assessment, Distribution of Humanitarian Relief Assistance. Establishment and Operationalization of the Emergency Operations Center (EOC) activating PSAM/GKK leaders ug Coordination and Collaboration with Parish Leaders and Local Government Units (LGUs).

Sa pinakaulahing kasayuran tali sa ASAC, gipahibalo ni Fr. Dublan nga andam na ang mga iapod nga dos cientos setentay singko ka food packs alang sa ikaduhang hugna sa Hunyo 26, 2026.

Nanginahanglan pa og dugang nga donasyon sama sa mga gamit sa kusina lakip na ang plato, kutsara, tinidor, baso ug kaldero, ingon man mga solar lamps, banig o tents, ug mga water containers.