Dayega ang ngalan sa Ginoo atong Hari

Ika-14 nga Domingo sa Ordinaryong Panahon (July 5, 2026)
Zec 9:9-10 / Ps 145:1-2, 8-9, 10-11, 13-14 / Rom 8:9, 11-13 / Mt 11:25-30

Malisod sa tawo ang pagdayeg sa Hari ug Ginoo kung wala diha kaniya ang pagpadayag, ang Espirituhanong kinabuhi ug ang pagpaubos nga maoy dalan sa kalinaw. Sa atong kahimtang karon, kita gipahimangnoan sa mga pagbasa nga makaila sa Dios, makapuyo nga subay sa Espirituhanong pagkinabuhi, ug sa pagkahimong instrumento sa kalinaw pinaagi sa pagpaubos.

Unsaon man ang giila sa yuta nga maalamon kung ang ilang kahibalo dili gikan sa Dios? Daghang miingon karon nga wala diha sa nagsuot og barong lamang ang katul-id sa kinabuhi. Bisan ikaw gisi og sinina apan magmatinud-anon sa imong trabaho ug wala nangawkaw, mas nadawat ka pa nga maalamon kay gipuy-an mo man ang kahibalo nga gigasa kanimo sa Dios. Sama sa Ebanghelyo, gikinahanglan nato ang pagpadayag gikan sa Ginoo alang sa iyang kaalam. Iampo nato nga ang giila niining kalibotana nga maalamon, makapuyo unta ug mogamit sa ilang kahibalo alang sa tumong sa naghatag niini nga mao ang Ginoo.

Unsaon man nato pag-uswag kung ang tanan diniktahan lamang sa lawasnong panginahanglan? Maut-ot gayod kita kung ang palabihon mao lamang ang lumalabay nga kalipay. Kung palabihon lamang ang tawag sa unod ug dili ang Espirituhanong pagkinabuhi, mamatay gayod kita. Diha lamang sa pagpalambo sa atong pagtoo, sa atong Espirituhanong kinabuhi, atong maangkon ang kaluwasan. Kini ang gipasabot sa ikaduhang pagbasa nga mahitabo kanato kung palabihon ta ang mga bunga sa atong pag tambong sa Eyukaristiya aron molambo ang atong kinabuhi sa pag-ampo. Kini mas maangkon nato kung kita makatudlo pinaagi sa pagsaksi sa atong pagtuo. Kini malig-on dinhi kanato kung atong ipahitabo ang matuod nga pag-alagad sa nanginahanglan nga walay pagpaabot og balos o sukli.

Unsaon man pag-angkon sa kalinaw isip nasod kung walay pagpaubos? Kung ang matag kampo o grupo moinsister nga siya maoy sakto, wala kitay padulngan nga maayo. Kung walay maminaw nga mapaubsanon sa matuod nga kahimtang sa usa’g usa, kagubot lamang ang atong mapupo. Kini ang mensahe sa unang pagbasa diin ang nagkaguliyang nga kahimtang sa tawo giayo sa Manunubos nga moabot nga mapaubsanon. Ang iyang pagpaubos maoy mobuntog sa kagubot nga dala sa sala. Kini iyang buntugon pinaagi sa mapaubsanon niyang pakigsama sa ubos ug kasagaran nga tawo.

Busa, atong ipakita isip mga magtutuo pagdayeg ug pag-ila sa atong Ginoo pinaagi sa kanunay’ng pagpamalandong sa Iyang kabubut-on, sa pagpili nga giniyahan sa Espirituhanong dikta, ug sa pagkamapaubsanon nga magdala og kalinaw.