Flores de Mayo Assessment ug Musical Team Building Gipahigayon

Adunay gipahigayon ang Holy Family Parish sa Baliok nga Flores de Mayo Assessment ug Musical Team Building niadtong Hunyo 8 ug 9, 2026 didto sa Our Lady of Victory, Camudmud, IGACOS.

Ang tumong niini mao ang mosunod:

1. Aron makahimo ang mga katekista sa pagtan-aw sa tibuok bulan sa Mayo nga kalihukan diha sa matag GKK pinaagi sa pag-inambitay sa kaugalingong kasinatian;
2. Aron adunay lig-on nga relasyon sa matag-usa pinaagi sa Musical Team Building nga mga kalihukan
3. Aron makapasalamat sa Dios pinaagi sa makanunayon nga pag-ampo ug pagdawat sa Sakramento sa Eyukaristiya nga mabungahon ug mahinuklogon.

Gisugdan ang kalihukan pinaagi sa usa ka Opening Liturgy ug Sharing sa mga kasinatian sa mga katekista unsay ilang mga kasinatian sulod sa bulan sa Mayo.

Matud pa ni Norielyn Lazarte, ang katekista nga gikan sa GKK Immaculate Conception-Rosalina Lower ” Nindot kaayo ang Flores de Mayo karong tuiga tungod kay ang mga bata makita nga interesado kaayo nga motambong matag adlaw tungod kay ang proceso sa pagtudlo dunay daghang acitivities matag topic. Bulahan kaayo ko bisan ako ra usa nga katekista sa among GKK, apan tungod sa grasya sa Dios uban sa pagpangama ni Birhen Maria nahimo gayod ang tanan.

Aurora Eso, katekista sa GKK St. Agustin-Baliok: “Nakahilak ko sa mga bata nga gikan sa sinugdanan mga 35 ka mga bata sugod sa unang adlaw sa Flores, nagpabilin kining maong number sa participants hangtud sa Culmination. Gibati nako ang dakong kalipay sa pagpadayon sa pagtudlo sa Flores de Mayo ug akong ginapangandoy na nga unta sa sunod tuig, mao lang gihapon ang pamaagi.”

Rosemarie Torrejos, usa ka katekista sa bag-ong namugna nga GKK Our Lady of Grace-Baliok. Hangtud karon gibati pa nako ang kalipay ug dakong pagpasalamat sa Dios uban ni Birhen Maria, nga gawas sa interest sa mga bata, ang mga ginikanan usab nakiglambigit sa tibuok bulan ug maoy misuporta mismo sa maong kalihukan. Haum kaayo ang tema sa tibuok bulan sa Mayo: ‘Mga Kabataan nga Mapasalamaton, Nagpadayon sa Pagpakig-uban kang Birhen Maria Padulong kang Hesus’.

Gipahigayon usab ang musical team building pinaagi sa mga awit nga gicomposed ni Fr. Diony Tabiliran, ang Kura Paruko sa Holy Family Parish.

Uban sa malampusong pagpahigayon sa Flores de Mayo, gisaulog kini dili lang ang katahom sa mga bulak, kondili ang katahom sa kasingkasing sa atong komunidad—gikan sa mga bata nga nagdala sa ilang yano nga halad, hangtod sa mga ginikanan ug madasigon nga nagpaluyo niini. Hinaut nga ang mga mithi sa kaputli ug pagpaubos nga atong nakatunan karon nga bulan magpadayon sa paggiya kanato sa matag adlaw. (Maddi Tito | Head Formation Minister)