Kasalan sa GKK San Vicente Ferrer, Sta. Marina, Tigatto

Usa ka makasaysayanong kalihukan ang nahitabo sa Gagmay’ng Kristohanong Katilingban (GKK) sa San Vicente Ferrer (SVF) sa Sta. Marina, Brgy. Tigatto niadtong Hunyo 27, 2026; diin adunay onse (11) ka magtiayon ang dungan nga nakadawat sa Balaang Sakramento sa Kaminyoon. Kini ang unang higayon nga adunay kasalan sa GKK nga gipahigayon sa maong kapilya.

Gipangulohan ni Rev. Fr. Orlando “Orly” Angelia, kura paroko sa St. Mary of the Perpetual Rosary Parish ang balaang misa ug seremonya sa kasal, nga gitambongan sa mga pamilya, paryente, ug mga miyembro sa komunidad. Napuno sa kalipay ug emosyon ang maong okasyon samtang ang mga magtiayon nagpanumpa sa ilang gugma ug pagkamatinud-anon atubangan sa Ginoo.

Ang mga magtiayon nga gikasal mao sila:

1) Izza Mae Reserva/Ronnie Mahinay, 2) Ma. Theresa Dela Torre/Ronald Seroy, 3) Jane Cruz/Chester Lausa, 4) Mary Grace Rodriguez/Antonio Frejoles Jr., 5) April Lyn Castillo/Mark Cluey Vistal, 6) Dinnes Guyay/Rose Mae Rodriguez, 7) Realiza Gino/Remark Manuray, 8)Rochelle Tulin/Reymond Cataliwalaan, 9) Rica Mae Manuray/Randy Tulin, 10) Rowena Balawag/Ronnel Manuray, 11) Aple Joy Renopal/John Dave Gabuya.

Kadaghanan sa mga magtiayon dugay nang nagpuyo isip bana ug asawa ug adunay mga anak. Ang uban kanila nag-uban na sulod sa 4 hangtod 16 ka tuig sa wala pa sila nakadesisyon nga magpakasal.

Matod sa ilang mga pahayag, dugay na nilang gihandom nga mahimong legal ug balaan ang ilang panaghiusa, apan napugngan sila sa kakulang sa pinansyal. Busa, ilang gidawat ang oportunidad sa mass wedding tungod kay mas gamay ang gasto ug dili na kinahanglan nga mubiyahe pa sa layo, kay gihimo kini mismo sa among GKK.

Alang kanila, dako kaayo kini nga panalangin ug higayon aron mapanalanginan sa Ginoo ang ilang pamilya ug mahatagan og lig-on nga pundasyon ang ilang kaminyoon.

Ang maong kalihokan usa ka maayong panig-ingnan sa panaghiusa sa simbahan ug komunidad sa pagtabang sa mga magtiayon nga matuman ang ilang pangandoy nga madawat ang sakramento sa kaminyoon. Nagbilin kini og inspirasyon nga ang tinuod nga gugma ug pagtuo kanunay adunay hustong panahon aron mapanalanginan. (Sylma Law, GKK SoCCom)