Nagpadayong Pormasyon alang sa Kalambuan

Sa pagpadayon sa pagpalig-on sa espiritwal ug propesyonal nga pagpangandam sa mga magtutudlo sa pagtuo, malampusong gipahigayon sa Parokya sa Sagrada Pamilya ang binulan nga pormasyon sa mga katekista sa tulunghaan niadtong Hulyo 31, 2026 sa Holy Family Parish Pavilion, Baliok, Davao City.

Gitambungan kini sa mga school catechists sa parokya nga nagkatigom sa usa ka adlaw sa pagkat-on, pagpamalandong, ug pagplano aron mas mapalig-on pa ang ilang misyon sa pagtudlo sa mga kabataan kabahin sa pagtuo.

Atol sa maong tigom, gihatagan ug pagtagad ang daghang mahinungdanong hilisgutan nga makatabang sa ilang ministriya, lakip ang:

• Pagrepaso sa Lesson Plans aron masiguro ang kalidad ug kahapsay sa pagtudlo;
• Review sa Psychology of the Learners, nga nagpahinumdom sa mga katekista sa importansya sa pagsabot sa panginahanglan, kinaiya, ug pamaagi sa pagkat-on sa mga estudyante;
• Follow-up sa Visual Aid Making, isip kabahin sa pagpalambo sa mas mamugnaon ug epektibong pamaagi sa pagtudlo;
• Spirituality of a Catechist, nga nagpasabot nga ang usa ka katekista dili lamang magtutudlo pinaagi sa pulong kondili labi na pinaagi sa maayong ehemplo ug kinabuhi nga puno sa pagtuo; ug
• Business Meeting, diin gihisgutan ang mga plano, kalihukan, ug ubang pastoral nga buluhaton

Ang padayon nga pagporma sa mga katekista nagpamatuod sa dakong bili sa pag-andam sa mga magtutudlo aron mahimong mas epektibo sa ilang misyon sa paghulma sa kinabuhi sa kabataan. Pinaagi sa hapsay nga pagpangandam ug pagpadayon sa pagkat-on, mas mapalig-on ang ilang katungdanan isip mga kaabag sa Simbahan sa pagsangyaw sa Maayong Balita.

Si Mrs. Madelyn Tito, Parish Head Catechist sa Holy Family Parish – Baliok, nagpahayag sa iyang pagpasalamat ug pagdasig ngadto sa tanang katekista:

“Salamat, Ginoo, sa kusog ug gugma nga Imong gipaambit kanamo isip mga tinawag nga magtutudlo sa pagtuo ngadto sa mga kabataan. Padayon unta kaming matinud-anon sa pagsangyaw sa Maayong Balita ug mahimong buhing saksi sa Imong gugma pinaagi sa among pulong ug binuhatan.”

Ang maong pormasyon usa ka pagpamatuod sa padayon nga paningkamot sa Parokya sa Sagrada Pamilya sa pagpalig-on sa pagtuong Kristohanon ug sa pag-andam sa mga katekista aron mahimong mas epektibo nga mga magwawali ug magtutudlo sa pagtuo. Pinaagi sa ilang dedikasyon ug pag-alagad, padayon nilang giyahan ang kabataan ngadto sa mas lawom nga pag-ila, paghigugma, ug pagsunod kang Jesu-Kristo. (Flor Arellano-Deloria, SoCCom Holy Family Parish, Baliok)