DRMC Nagpalig-on sa Misyon sa pag-atiman sa kinaiyahan pinaagi sa Solar Hybrid Systems

Nagpadayon ang Davao Redemptorist Mission Community (DRMC) sa iyang misyon sa pag-atiman sa kinaiyahan pinaagi sa pagblessing ug pag-komisyon sa duha ka bag-ong 30KWp Solar Hybrid Systems nga adunay 60KWh LiFePO batteries niadtong Hulyo 31, 2026.

Ang maong renewable energy systems maghatag og malungtaron ug kasaligan nga suplay sa kuryente alang sa simbahan ug sa Parish Pastoral Building, isip kabahin sa paningkamot sa komunidad sa pagpalambo sa responsableng paggamit sa enerhiya ug pag-atiman sa kabuhatan.

Gipangunahan ni Rev. Fr. Edilberto Cepe, C.Ss.R., Provincial Superior, ang seremonya sa pagblessing ug pagkomisyon. Mitambong usab ang mga representante sa Parish Pastoral Council, Church Council, mga miyembro ug kawani sa Davao Redemptorist Mission Community, ingon man ang mga representante sa Caresystem Technology Solution Co., Inc., nga gipangulohan ni Engr. Arman Capin, MBA, Chairman sa Board of Directors.

Labaw pa sa usa ka pagpalambo sa imprastraktura, ang pag-instalar sa solar hybrid systems usa ka konkretong pagpamatuod sa padayon nga pagtuman sa Kongregasyon sa mga Redemptorista sa panan-awon sa Laudato Si’. Pinaagi sa paggamit sa limpyo ug mabag-o nga tinubdan sa enerhiya, gipalig-on sa komunidad ang iyang misyon sa pag-alagad samtang nag-amot sa pagpanalipod sa kinaiyahan ug sa responsableng pag-atiman sa panimalay nga gisaligan sa Diyos.

Isip unang pilot site sa renewable energy isip inisyatibo sa Redemptorist Province of Cebu, ang Davao Redemptorist Mission Community gilauman nga mahimong ehemplo alang sa ubang Apostolic Units sa probinsiya. Ang maong inisyatiba nagtinguha sa pagpalapad sa paggamit sa renewable energy aron masuportahan ang mas malungtarong misyon ug ministeryo sa Kongregasyon alang sa umaabot.

Ang maong kalihokan nagpakita nga ang Simbahan dili lamang nag-awhag sa pag-atiman sa kinaiyahan pinaagi sa pagtulon-an, kondili nagpakita usab og konkretong mga lakang aron mapreserbar ang kinaiyahan alang sa sunod nga mga henerasyon.

Viva OMPH!

(By Mary Grace Gonzales | OMPH SocCom)