Ika-78 nga Kapistahan: Kasaulogan sa Kinabuhi, Grasya ug Kalooy

Nagsaulog ang parokya sa The Most Sacred Heart of Jesus, Calinan sa ilang ika setentay otso ka tuig nga kapistahan niadtong Agosto 7, 2026 sa tema: Mahal nga Kasingkasing ni Jesus: Tinubdan sa Kinabuhi, Grasya ug Kalooy.

Ang kapistahan ilang gipangandamanan pinaagi sa Novena masses nga gihimo gikan Hulyo 29 hangtod Agosto 5. Matag hapon, nagtigom ang mga parokyano alang sa novena ug pagsaulog sa Santos nga Misa, nga nahimong panahon sa pag-ampo, pagpamalandong ug pagpangayo sa panalangin sa Mahal nga Kasingskasing ni Jesus.

Sa bisperas, Agosto 6, gipahigayon ang Solemneng Prosesyon palibot sa Calinan Poblacion, diin nagkahiusa ang mga pari, relihiyoso, layko ug mga pamilya sa pagdala sa ilang debosyon ngadto sa Mahal nga Kasingkasing ni Jesus. Gisunod dayon ang Santos nga Misa uban sa mga kaparian sa Calinan.

Niadtong Agosto 7, 2026, ang Adlaw sa Kapistahan, adunay upat ka Santos nga Misa. Ang Pontifical Mass nga gipanguluhan sa atong Halangdong Arsobispo sa Davao, Most Rev. Romulo G. Valles D.D., gisaulog sa alas otso sa buntag.

Nahimong higayon ang Pontifical Mass usab sa pagpasalamat alang sa 78 ka tuig nga pagtuo, pag-alagad ug panaw sa The Most Sacred Heart of Jesus Parish sa Calinan. Sa Homiliya ni Archbishop Valles, kita gipahinumdoman nga ang Mahal nga Kasingskasing ni Jesus mao ang tinubdan sa kinabuhi, grasya ug kalooy. Nagkahiusa kita nga naghalad sa atong Kasingkasing nga mahimong sama sa Kasingkasing ni Jesus ug motubo uban Kaniya.Ang Iyang gugma mao ang kusog nga nagdasig sa mga Kristohanon sa pagpadayon sa pagtuo, bisan taliwala sa mga pagsulay ug hagit sa kinabuhi. Ang Dios unang nahigugma kanato bago nato Siya gihigugma”. Ang Ebanghelyo nag-ingon: Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo. isangon ang Akong yugo ug sunda ninyo ako, kay malumo akonug mapa-ubsanon sa espiritu, ug makapahulay kamo. Sayon ang yugo nga akong ihatag Kaninyo ug gaan ang ipapas-an ko kaninyo. Gitapos Ni Archbishop Valles ang iyang Homiliya sa pag-ingon: Ang misteryo sa Gugma ni Jesus nga maduolan nato siya kay bisan pa wala pa kita moudol kaniya, Gihigugma na Kita Niya, ug siya midugang Ang atong kasingkasing dili mahiluna, until it rest in You, Sacred Heart of Jesus”.

Ang kasaulogan nahimong usa ka talagsaong higayon alang sa tibuok parokya aron sa pagpalig-on sa pagtuo, paghiusa sa mga pamilya, ug pagpasalamat sa daghang grasya nga nadawat pinaagi sa matinud-anong pag-alagad sa Simbahan.

Human sa Pontifical Mass, ang kasaulogan mipadayon sa nagkalain-laing zona pinaagi sa mga barrio fiesta. Ang matag zona nag-andam sa kaugalingong panagtigom aron sa pagpaambit sa kalipay, panag-uban ug panag-igsoonay.

Sa mga barrio fiesta, ang mga pamilya, silingan, ministry members ug mga komunidad nagtigom aron magkauban sa pagpangaon, pag-istoryahanay, paglingaw-lingaw ug pagpasalamat. Ang yano nga panagtigom nahimong usa ka mahinungdanong pagpamatuod nga ang pista dili lamang mahitungod sa selebrasyon, kondili mahitungod usab sa pagpalig-on sa relasyon tali sa mga tawo isip usa ka Kristohanong komunidad. Ang matag lamesa nga gitapokan, matag pagkaon nga gipaambit, ug matag pahiyom nga makita sa mga tawo nahimong hulagway sa grasya ug kalipay nga naggikan sa gugma ni Jesus.

Nagpahinumdom ang ika-78 nga Parochial Fiesta nga ang Simbahan dili lamang usa ka building. Kini usa ka komunidad sa mga tawo nga gitigom sa gugma sa Dios.

Nag-awhag ang tema nga “Tinubdan sa Kinabuhi, Grasya ug Kalooy” sa matag parokyano nga dili lamang modawat sa gugma ni Jesus, kondili mahimong tinubdan usab sa kinabuhi, grasya ug kalooy alang sa uban. Pinaagi sa pag-alagad, pagpakabana, pagpasaylo, pagpaambit ug paghiusa, ang matag miyembro sa parokya mahimong instrumento sa gugma sa Mahal nga Kasingskasing ni Jesus.

Sa 78 ka tuig nga panaw, ang Most Sacred Heart of Jesus Parish sa Calinan nagpadayon sa pagbarog isip komunidad sa pagtuo ug paglaum—usa ka parokya nga nagpadayon sa paglakaw uban ni Kristo ug sa pagpaambit sa Iyang gugma ngadto sa tanan.

VIVA, MAHAL NGA KASINGKASING NI HESUS!!

(By Echerica U. Yamba|SocCom Head, Sacred Heart of Jesus Vicariate)