Kung tininuod ang atong pagpabunyag

Ika-22 nga Domingo sa Ordinaryong Panahon (August 30, 2026)
Jer 20:7-9 / Ps 63:2, 3-4, 5-6, 8-9 / Rom 12:1-2 / Mt 16:21-27

Sa mga nagpabunyag nga mao ang sukaranan sa atong paglakaw isip sumusunod ni Kristo, nasabtan ba nato unsay kahulogan niini? Andam ba gyud kita nga midawat sa bunyag nga molakang uban ni Kristo?

Kung tininuod ang atong pagpabunyag, andam ta nga moapas-an sa atong krus sama sa hagit ni Kristo sa Ebanghelyo. Ikaw, makasakripisyo ba nga dili manikas o manlimbong sa negosyo? Motrabaho ka ba nga tinuod bisan kon Wala magtan-aw ang imong amo? Wala ka ba mamintaha sa uban? Dili ka ba mamakak o mangopya sa klase?

Kon tinunuod ang atong pagpabunyag, mahisama kita kang Jeremias sa unang pagbasa nga magdilaab ang atong kasing-kasing sa pagsangyaw sa kaayo sa Ginoo bisan malisod. Modawat ka ba nga kataw-an o isalikway sa uban tungod kay nagtinarong ka sa imong buhat? Makapaubos ka ba kung gibiay-biayan ka? Makapsaylo ka ba sa tawo nga ingrato kanimo? Nagpabilin ka ba nga lig-on kon ang uban tikasan na?

Kon tininuod ang atong pagpabunyag, gitugyan nato ang atong kaugalingon sa Dios ug dili magpahiuyon sa pamatasan niining panahona sama sa hagit ni San Pablo sa ikaduhang pagbasa. Lahi ka ba sa uban nga buot modawat lamang ug dili maghuna-huna sa paghatag? Lahi ka ba sa uban nga gusto og dali ug sayon nga dili magsakripisyo? Lahi ka ba sa uban nga gusto gyud kanunay mauna ug ilhon nga mas kuyaw sila kaysa magpaubos nga mohulat ug magpasidungog kanila?

Kung tininuod ang atong pagpabunyag, sumala sa Salmo ang atong kalag uhawon gayod sa Ginoo.