“Gasa Ko, Halad Ko” Raffle for a Cause Gilunsad sa San Pedro Cathedral

Sa malipayon ug mapasalamaton nga kasingkasing, opisyal nga gilunsad ang “Gasa Ko, Halad Ko” Raffle for a Cause, isip usa ka hiniusang paningkamot sa katawhan sa San Pedro Cathedral Parish alang sa padayong pag-ayo sa atong hinigugmang Katedral, ilabi na sa iyang Façade.

Ang maong kalihukan gipangulohan ni Rev. Msgr. Paul Cuison, Cathedral Rector, uban sa Parish Pastoral Council ug Finance Team, pinaagi sa usa ka mubo apan makahuluganon nga pag-ampo ug panalangin.

Ang matag tiket nga atong mapalit dili lamang naghatag og kahigayunan nga makadaog og maanindot nga mga premyo, kondili usa usab kini ka halad sa matag matinud-anong tumutuo alang sa pag-atiman ug pagpanindot sa balay sa Ginoo. Ang atong gasa mahimong atong halad alang sa San Pedro Cathedral ug sa umaabot nga mga henerasyon.

Matag ticket nagkantidad lamang og ₱200.00 ug ang mga nakalatid nga premyo mao ang: Grand Prize – BYD Atto 2, 2nd Prize – Bajaj RE Tricycle, 3rd Prize – Yamaha YTX Motorcycle ug Consolation Prizes – 7 Bicycles. Ang draw date karong umaabot nga December 27, 2026 (Domingo) 3:00 PM ug ipahigayon sa Ateneo de Davao University, Martin’s Hall, Jacinto Campus. Mapalit ang mga tiket sa Parish Office ug sa mga booth gawas sa Cathedral.

Maghiusa kita sa paghatag ug paghalad! Kay sa matag tiket, adunay paglaum; sa matag halad, adunay dakong tabang alang sa atong Katedral.

Gasa Ko, Halad Ko — alang sa Katedral, alang sa komunidad, ug alang sa usa ka maayong katuyoan! (Akiramae Davao, San Pedro Cathedral SoCCom)