Puy-i ang pagkapinasaylo sa Ginoo

Ika-25 nga Domingo sa Ordinaryong Panahon (September 20, 2026)
Is 55:6-9 / Ps 145:2-3, 8-9, 17-18 / Phil 1:20-24, 27 / Mt 20:1-16

Kung sa niaging Domingo gihatagan og gibug-aton ang pagpasaylo, karong Domingoha gipahimangnoan kita sa pagkinabuhi sama nga gipasaylo kita sa Dios. Unsa bay mga kahigayonan nga mapuy-an nato ang pagkapinasaylo?

Sa Ebanghelyo, ang iyang pagkamapasayloon iyang gipakita diha sa pagtawag kanato sa tanang takna sa atong kinabuhi. Abli kanunay ang Ginoo nga mopatrabaho kanato sa iyang parasan, nga mao ang kalibotan, pinaagi sa atong pag-alagad sa uban. Gidapit kita sa Ginoo nga igahin ang atong panahon, kusog ug talento aron sa pag-ugmad sa iyang katawhan aron mamunga. Labaw pa niana, bisan kon sa mga mata sa kalibotan kita misanong sa iyang tawag nga daw ulahi na, ang Dios mohatag gihapon kanato sa samang suhol o ganti sumala sa gikasabotan. Manggihatagon ang Dios kanato aron moganti sa atong pagtubag. Apan, motubag ba kaha kita kon dapiton na sa pagsunod kaniya? O basin kaha daghan kitag rason nga mobalibad?

Sama kang San Pablo, sa ikaduhang pagbasa, ang kinabuhi mao si Kristo. Kung andam gayod kita nga mopuyo sa tawag sa Ginoo sumala sa iyang kabubut-on, pilion gayod nato si Kristo, ang iyang mga gitudlo ug gimithi, ang gihatagag bili ug misyon. Kung duna may mga kasakit ug pagsulay tungod sa pagsunod kaniya, dili kini makapabalda kanato. Hinunoa, mas puy-an pa hinuon nato ang subay sa iyang dalan. Ipalabi gayod nato ang pagpakita kung unsa kabililhon ang pagbarog alang Kaniya. Karon, nasusi mo ba kung nagkinabuhi ka ba sama kang Kristo? Nagpadayon ka ba sa pagsunod sa iyang panig-ingnan? Napuy-an mo ba ang pagkamaayong ehemplo taliwala sa kalibotan nga napuno sa pagpanikas ug pagpangawkaw?

Busa tawag ug pangita ang Ginoo samtang ania pa siya. Mao kini ang singgit diha sa unang pagbasa. Duol kaniya samtang haduol siya. Siya manggihatagon ug maloloy-on bisan pa kung sa makadaghan ang iyang mga paagi dili nato masabtan. Hataas ang iyang pagsabot ug kaalam. Kanunay siya nga nangitag paagi aron sa mga yanong kahimtang masinati nato siya. Bisan tuod usahay dili nato masabtan nganong adunay mga hulga sa kasong pagpamatay sulod sa atong mga tulunghaan, nakita mo ba nga siya masangpit ug maduolan? Bisan usahay dili nato matugkad nganong daghang mga katalagman sama sa mga baha, linog, sunog ug uban pa, nabati mo ba ang iyang mensahe ug presensiya?

Busa, ablihi ang imong kaugalingon sa Dios nga mapasayluon. Nagapaduol siya diha sa iyang pagkamapasayluon. Nagapaduol kanunay ang Dios kung mosangpit kita kaniya.