Ang Krus ni Hesus Dalan sa Kaluwasan Diha sa atong Pagtuo

Septembre 14, 2026 | Gisaulog sa GKK Sta. Cruz, Balengaeng, sakop sa parokya San Juan Pablo Segundo and ika-90 nga GKK Fiesta uban sa tema: Balaang Krus: Kahayag sa Pagtuo, Timaan sa Paglaum. Gipanguluhan ang Santos nga Misa sa Kura Paroko sa St. John Paul II Parish, Los Amigos.

Gisugdan ang Novena niadtong Septembre 5 ug gitapos niadtong Septembre 13 pinaagi sa pag prusisyon sa Krus nga sakop sa ilang Gagmayng Kristohanong Katilingban agig pagpasidungog sa ilang debosyon. Pinaagi sa Santos nga Misa, gisaulog ang mga panalangin nga nadawat sa Gagmayng Kristohanong Katilingban ug gihatag pag-usab ang kaugalingon ngadto sa Ginoo. Sa maong pagsaulog, usa ka importante nga pahinumdom ang gihatag mahitungod sa Krus ni Hesus. Ang Krus dili lamang usa ka simbolo, apan mao ang nahimong dalan sa kaluwasan diha sa pagtuo. Pinaagi sa Krus, gipakita ni Hesus ang Iyang dakong gugma ug sakripisyo alang sa katawhan.

Atol usab sa pagsaulog sa Santos nga Misa, pito ka mga bata ang midawat sa Sakramento sa Bunyag, nga nahimong usa ka importante nga bahin sa panaw isip mga anak sa Diyos ug sakop sa Kristohanong Katilingban.

Kini mao ang Krus ni Hesus, diin Iyang gipakita ang labing dakong gugma ug sakripisyo alang sa katawhan. Hinaut nga ang Krus ni Kristo magpabiling sentro sa kinabuhi, pamilya, ug katilingban, ug mahimong giya sa matag lakang sa pagtuo diha sa pag-alagad. (Jonathan Paeldilan | SJPII SoCCom)