Kung Moabot Ang Wala Damha Ug Kapakyasan

Ika-27 nga Domingo sa Ordinaryong Panahon
Is 5:1-7 / Ps 80:9, 12, 13-14, 15-16, 19-20 / Phil 4:6-9 / Mt 21:33-43

Unsa bay mga hitabo nga wala nimo damha? Unsa bay imong kasinatian nga ikaw napakyas o gipakyas? Giunsa ba nimo kini pag-atubang?

Tataw sa Ebanghelyo ang wala damha apan napakyas nga kakugi ug pag-atiman sa tag-iya sa parasan. Wala niya madawat ang bunga sa iyang kahago. Dili usab mao ang pagtratar alang kaniya sa iyang mga piniyalan. Tungod sa kahakog ug pagka-ingrato sa mga piniyalan, daghang kinabuhi ang nakalas. Apan ang Dios aduna kanunay mohimog lakang aron makab-ot ang kaayo ug kaluwasan sa tanang katawhan nga iyang gipangga. Dili siya mahutdan o mawad-an og pamaagi aron maangkon sa iyang katawhan ang gipangandoy nga kahiusa, kalinaw ug himaya. Ikaw ug ako kabahin nianang kapakyasan. Apan dili kita mawad-an og paglaum kay ang Dios naglihok taliwala sa mga wala damha. Sa mga krisis nga giatubang sa atong nasod naglihok gihapon ang Dios taliwala sa mga wala nato damha.

Si San Pablo, sa ikaduhang pagbasa, nagdapit kanato nga dili lamang mabalaka. Hinunoa, padayon kita nga mag-ampo uban ang pagpasalamat. Mobuhat lamang kita sa hustisya ug kaangayan. Dili nato kalimtan apan paningkamotan nga mapuy-an ang unsay gitudlo kanato. Bisan sa atong pagkulang tabangan kita sa Ginoo kung mopunting kita sa atong huna-huna diha kaniya, kung mogahin kita sa atong kusog ug panahon diha sa pagsunod ug pag-alagad kaniya. Ang atong pagmalig-on sa pagbuhat sa sakto taliwala sa mga tintal ug haylo maoy magdala kanato sa kalinaw sa kasing-kasing. Sa mga krisis nga wala nato pangandoya, dili kita maluya apan mag-ampo ug padayon sa pagbuhat sa maayo.

Gani, ang plano sa Ginoo nga gitagna na ni Propeta Isaias diha sa unang pagbasa, nag-abli man alang sa tanang binuhat. Ang nahitabo nga wala damha, ang mga napakyas nga paningkamot, dili makapugong sa kaayohan gihan-ay alang sa tanang katawhan nga gimahal sa Ginoo. Nahimo hinuon nga kahigayonan ang dili pagbunga sa angay alang sa pagdiskubre sa posibleng mahimo sa uban. Nakahatag kini og higayon aron mas molambo ang kaamguhan nga ang kaluwasan alang gyud diay sa tanan ug ang kaluwasan sa Ginoo walay pinalabi. Sa mga krisis nga karon atong giatubang mobutho unta ang mga maayong tawo, panghuna-huna ug hiniusang lihok aron ang ang wala nato gipasabot nga mahitabo mahimong higayon aron mahagit ang atong pagkaabli sa isigkaingon.

Busa, isip bag-ong katawhan sa Israel, dawaton ta nga mapaubsanon ang atong kapakyasan. Mag-ampo kita nga magpasalamaton ug mobuhat sa angay. Ablihan ta ang atong kaugalingon alang sa kaayo sa uban.