Musikero ni Kristo

Dili tanan nga pagtugtog sa gitara parehas. Alang sa mga musikero ni Kristo nga nag-alagad sa Simbahan, ang matag kaskas sa kuwerdas adunay espirituhanong kahulugan ug misyon nga labaw pa sa paghatag og maayong tuno.

Niadtong Setyembre 19, gikan sa ala una sa hapon, nagtapok ang mga gitarista gikan sa nagkadaiyang Gagmay’ng Kristohanong Katilingban (GKK) sa Holy Family Parish alang sa usa ka Guitar Workshop nga gihimo sa GKK Divine Mercy Chapel sa Susana Homes, Baliok, Davao City. Ang kalihokan gipahigayon isip kabahin sa padayon nga pagporma sa mga musikero nga nag-alagad sa liturhiya.

Gidumala ang maong workshop ni Kaparokya Amiel Baculna, kinsa nailhan sa iyang kahibalo ug kasinatian sa paggiya ug pagbansay sa mga grupo sa liturhikal nga musika. Pinaagi sa iyang mga pagtulon-an, nasabtan sa mga partisipante nga adunay dakong kalainan tali sa ordinaryong pagtugtog sa gitara ug sa pag-uban sa mga awit sa Balaang Misa ug uban pang liturhikal nga pagsaulog.

Bisan pa sa kadugayon sa kasinatian sa ubang gitarista, daghan ang nakadiskobre og bag-ong pagtan-aw sa ilang apostolado. Ilang nasabtan nga sa liturhiya, ang musika dili sentro sa selebrasyon kondili usa ka paagi aron mas lawom nga makigtagbo ang katawhan ngadto sa Dios. Ang hustong pamaagi sa pagkaskas sa gitara, ang pagpili sa awit, ug ang pagtuman sa mga giya sa Simbahan adunay dakong papel sa pagpalambo sa espiritu sa pag-ampo sa tibuok katilingban.

Dugang pa sa praktikal nga pagbansay sa pagtugtog , gitudloan usab ang mga partisipante sa hustong pagpili ug pag-andam sa mga awit nga angay sa matag liturhikal nga selebrasyon. Kini usa kamahinungdanong bahin sa ministriya sa musika aron masiguro nga ang mga awit nahiuyon sa tema ug diwa sa pagsaulog sa Simbahan.

Gipadayag ni Mr. Widjenie Marcardo, Parish Music Ministry Coordinator, ang iyang dakong pagpasalamat kang Rev. Fr. Dionisio C. Tabiliran, DCD, Parish Priest, tungod sa iyang walay hunong nga suporta sa mga kalihokan nga nagpalig-on sa mga ministriya sa parokya. Matod niya, ang workshop nakatabang aron mas mapalalom sa mga gitarista ang ilang pagsabot sa kahinungdanon sa pagsunod sa mga liturhikal nga giya sa pagserbisyo pinaagi sa musika.

Bisan mubo lamang ang oras sa workshop, dako ang nahimo niini sa mga partisipante. Daghan kanila ang nagpahayag sa ilang tinguha nga adunay sunod nga sesyon aron mas mapalambo pa ang ilang kahibalo ug kahanas isip mga gitaristang nag-alagad sa ilang tagsa-tagsa ka GKK.

Sa katapusan, ang workshop nahimong usa ka mabungahong higayon sa pagkat-on ug pagpamalandong. Nagbukas kini sa mga mata sa mga musikero nga ang pagserbisyo pinaagi sa musika dili lamang mahitungod sa pagpatugtog sa instrumento, kondili sa paggiya sa katawhan ngadto sa usa ka mas lawom nga kasinatian sa pag-ampo ug pagsimba. Sa matag nota ug sa matag kaskas sa kuwerdas, nagpadayon ang ilang misyon sa pagdala sa mga kasingkasing ngadto sa presensya sa Ginoo. (Flor Arellano-Deloria SoCCom, HFP, Baliok)