Pagkahiusa ug Pagdayeg: 1st Religious Night Malampusong Gipahigayon sa Ika-43 nga Araw ng Tagakpan

TAGAKPAN, DAVAO CITY — Ubos sa pagdumala sa Tagakpan Barangay Council sa panguna ni Barangay Kapitan, Hon. Joel Juntong, malampusong gipahigayon ang labing unang First Religious Night niadtong milabayng Septyembre 30, 2026, diha sa Barangay Tagakpan Gymnasium.

Ang maong kalihokan usa sa mga nag-unang highlight sa pagsaulog sa Ika-43 nga Araw ng Tagakpan. Matod pa sa pamunuan sa barangay, ang nag-unang katuyoan sa maong aktibidad mao ang pagpalig-on sa relasyon, panag-uban, ug panag-fellowship sa nagkalain-laing denominasyon sa simbahan nga anaa nahimutang sa sulod sa barangay.

Gisaksihan sa gatusan ka mga deboto ug lumulupyo ang talagsaong panagtipon diin pito (7) ka mga lokal nga simbahan ang aktibong nipartisipar aron ipakita ang ilang panaghiusa pinaagi sa pagpraise ug worship. Ang mga misalmot nga simbahan mao ang San Francisco De Asis Parish, Tagakpan Foursquare Gospel Church, Seventh Day Adventist, Cogon Alliance Church, Temple of God, ug Jesus Christ Community Outreach Church.

Ang tibuok programa gigiyahan ug gipasukad sa balaang pulong gikan sa Salmo 133:1 nga nag-ingon: “Pagkamaayo ug Pagkaanindot kong ang katawhan sa Dios Magpuyo nga adunay Panaghiusa.”

Nagbaha ang garbo ug tiunay nga pagdayeg sa sulod sa gymnasium sa dihang nagpakita sa ilang mga talan-awon ug kahanas ang matag delegasyon. Mapasandungon nilang gihatubang ang entablado pinaagi sa pag-awit og mga makapatandog nga Praise and Worship songs, dungan sa madasigon ug mabulukong mga presentation sa pagsayaw.

Usa usab sa naghatag og dakong duso sa maong gabii mao ang dinapit nga mamumulong kun Guest Speaker, kinsa naghatag og madasigong mensahe kabahin sa tinuod nga kahulogan sa panaghiusa. Iyang gipunting nga bisan pa man nagkalain-lain ang matag usa sa hisgutanang sekta ug doktrina, ang tanan nagkahiusa tungod sa usa ka Manluluwas ug ubos sa usa ka misyon.

Dako ang iyang pagpasalamat sa higayon ug nagbilin siya og lig-on nga panawagan nga wad-on ug bulagon na ang pagbinahinay o ang “gap” tali sa mga simbahan. Matod pa niya, sa karong panahona, dako ang panginahanglan sa nasud alang sa pagkahiusa—labaw na gayod sa mga Kristohanon.

Tungod niini, dako usab ang pagpasalamat sa mga Pastors, Church Leaders, ug mga Pari ngadto sa Barangay Council ug kang Kapitan Juntong tungod kay mao kini ang labing unang higayon nga nagkahiusa ang mga tinuohan pinaagi sa usa ka “Religious Night” sa kasaysayan sa barangay.

Sa katapusan sa programa, gipahigayon ang usa ka madasigong Community Dance diin masadyaong nisalmot ang tanang mga partisipante aron ipakita ang ilang tiunay nga panahigalaay ug panaghiusa.

Ang maong mabulukong gabii gitapos pinaagi sa usa ka hiniusang pag-ampo—diin gihangyo nga unta ang maong panaghiusa dili lang kutob nianang gabhiona, kondili magpadayon ug maghari sulod sa matag panimalay, sa matag simbahan, ug sa tibuok komunidad sa Tagakpan. (Dr. Jaylord S. Pasana, CPE – Church Youth Leader, Jesus Christ Community Outreach Church – Tagakpan)