KASIKAS 2.0: Sayaw, Hataw ug Panaghiusa sa Parokya sa Sagrada Pamilya

Kapin sa 200 ka partisipante gikan sa nagkadaiyang GKK ang mitambong sa unang hugna sa KASIKAS 2.0 – Zumba (Kalipay, Singgit, Kasadya) niadtong Setyembre 26, alas-6:00 sa buntag, sa Barangay Baliok Gym, Davao City. Adunay ₱50 nga registration fee alang sa mga partisipante, diin ang kita gamiton isip suporta sa mga galastuhon alang sa umaabot nga kapistahan.

Ang zumba gipanguluhan ni Vhieljhoy Locob, uban sa ubang mga zumba enthusiasts nga mitabang sa pagpalagsik sa programa. Gipasidunggan usab ang mga partisipante nga mipakita sa ilang kahanas ug kadasig. Nidaog si Kris Andrade alang sa KASIKAS Sayaw Award, samtang si Krishtensie Tingsod maoy nakadaog sa KASIKAS Hataw Porma Award. Gihatagan usab og higayon ang mga partisipante nga makadaog sa raffle prizes.

Nagpasalamat si Mr. Iyong Pepino, committee head, sa tanang mitambong ug sa mga indibidwal nga mitampo sa malampusong pagpahigayon sa unang episode sa KASIKAS 2.0. Giawhag usab niya ang tanan nga magdala og dugang nga mga higala aron mas mudaghan pa ang muapil sa sunod higayon nga pagahimoon sa Oktubre 24 sa IWHA Gym, Barangay Dumoy.

Labaw sa sayaw ug ehersisyo, ang KASIKAS 2.0 – Zumba nagtinguha nga mapalambo ang healthy lifestyle, panaghigalaay ug panaghiusa sa mga miyembro sa nagkadaiyang GKK—usa ka kalihukan kung diin ang kahimsog ug panaghiusa mag-uban sa matag hataw ug sayaw. (Flor Arellano Deloria | Photos: Parish Social Media Team)