Ika-22 nga Anibersaryo sa Parokya sa Sagrada Pamilya

Malipayong gisaulog sa mga parokyano sa Sagrada Pamilya ang ika-22 nga Anibersaryo nga Katukuran sa Parokya (Canonical Erection) niadtong Oktubre 2. Gipangulohan ni Rev. Fr. Dionisio Tabiliran, kura paroko, ang Santos nga Misa nga nahimong sentro sa maong kasaulogan. Kini usa ka higayon sa pagpasalamat sa Ginoo sa 22 ka tuig nga panaw sa pagtuo, pag-alagad, ug panaghiusa sa mga parokyano.

Pinaagi sa pagsaysay sa mga storytellers nga sila Leslie Bgagares, Florence Anne Dumanjug, Louie Jay Yuag, ug Althea Cabal, gipahinumdoman ang mga lumulupyo sa Barangay Dumoy ug Baliok sa yano apan mahinungdanong mga pangandoy nga nahimong sinugdanan sa pagtukod sa parokya.

Gipadayag usab nila ang kasaysayan sa pag-uswag sa parokya ubos sa paggiya sa nagkalainlaing mga kura paroko: si Rev. Fr. Henry Campeon, gikan sa 2004 hangtod 2012; si Rev. Fr. Ricky Peñalosa, , gikan sa 2012 hangtod 2018; ug si Rev. Fr. Roger Duhaylungsod, gikan sa 2018 hangtod 2025. Gikalipay pag-ayo sa mga parokyano ang padayon nga panaw sa parokya ubos sa kasamtangang pag-atiman ni Rev. Fr. Dionisio Tabiliran, inubanan ni Rev. Fr. Danilo Dotollo.

Isip pag-ila sa ilang dakong kontribusyon, gipasidunggan ug gipasalamatan ang mga tawo nga nanguna ug naningkamot aron matuman ang pangandoy nga matukod ang parokya. Ang ilang dedikasyon ug pag-alagad nahimong kabahin sa pundasyon sa komunidad sa pagtuo nga padayon nga naglambo hangtod karon.

Usa sa labing malipayong higayon sa maong pagsaulog mao ang pagtambong sa unang kura paroko, si Rev. Fr. Henry Campeon. Ang iyang presensya nahimong makahuluganon nga pahinumdom sa mga sinugdanan sa parokya ug sa paningkamot sa mga tawo nga nagtibangay sa pagtukod niini.

Makita sa mga nawong sa mga parokyano ang kalipay ug garbo sa pagtubo sa parokya gikan sa yano nga sinugdanan. Ang maong kalamboan nagpamatuod sa bili sa panaghiusa, pagtinabangay, ug hiniusang pag-alagad sa mga sakop sa komunidad. Labaw sa pisikal nga pagtubo, nagpadayon ang parokya isip panimalay sa pagtuo ug paglaom alang sa katawhan sa Dumoy ug Baliok.

Kabahin usab sa pagsaulog sa ika-22 nga anibersaryo ang pagpahigayon og Medical, Dental ug Optical Mission, lakip ang ubang serbisyo sa panglawas alang sa mga residente niadtong Oktubre 10. Gipangulohan kini ni Dr. Ruby Ann Limpot, koordinador sa Health Care Ministry, uban sa mga boluntaryo gikan sa Caritas, mga Pangulo sa Alagad, ug ubang GSLs.

Pipila ka residente ang nakadawat sa nagkalainlaing serbisyong medikal, dental, ug optical, lakip ang mga tambal nga gihatag subay rekomendasyon sa mga doktor. Pinaagi niini, gipakita pag-usab sa parokya nga ang pag-alagad sa Simbahan dili lamang kutob sa pagsaulog sa liturhiya, kondili naglakip usab sa konkretong pag-atiman sa panglawas ug kaayohan sa isigkatawo.

Sa pagsaulog sa 22 ka tuig sukad sa kanonikong pagtukod niini, ang Parokya sa Sagrada Pamilya nagpadayon sa pagdala sa mensahe sa pagtuo, panaghiusa, ug pag-alagad. Ang maong anibersaryo nahimong pahinumdom nga ang usa ka buhi ug naglambo nga komunidad sa Simbahan gitukod dili lamang pinaagi sa mga materyales, kondili labaw sa tanan pinaagi sa mga tawo nga nagkahiusa sa pagtuo ug nagtinabangay sa pag-alagad sa Ginoo ug sa isigkatawo. (Flor Arellano-Deloria)