Pag-igmat, laum ug lahutay

Ika-32 na Domingo sa Ordinaryong Panahon (November 8, 2026)
Wis 6:12-16 / Ps 63:2, 3-4, 5-6, 7-8 / 1 Thes 4:13-18 / Mt 25:1-13

Usahay kung pukawon ta sa atong ginikanan sa mga bata pa ta, unya dugay mobangon kay magtulog-tulog ta, ingnon ta nga, “hala kung mag-ulan og kwarta wala gyud moy makuha.” Ang sayo kuno mobangon ug magkugi adunay mapupo.

Sa Ebanghelyo, gipahimangnuan kita sa kanunay nga pag-igmat, dili lang ang pagmata. Pag-igmat sama sa mga maalamon nga dalaga nga adunay igo nga lana alang sa ilang suga alang sa pag sugat sa pamanhunon. Kining sambingay gigamit ni Jesus aron andam kita kanunay sa bangkite sa kaluwasan pinaagi sa pagbuhat kanunay sa kaayo. Walay tulganay ug walay pagpalong sa maayong kinaiya ug buhat alang sa tawo nga nagpuyo sa paghigugma kang Kristo. Kanunay niya kini nga gipuy-an sa hayahay man o kalisdanan, sa kalampusan man o kapakyasan.

Ipakita kini sa tawong malaumon. Taliwala sa krisis o kangitngit, nagpabilin siya nga kugikan, matinud-anon ug malipayong isip magtutuo. Dili mahanaw ang iyang maayong batasan nga puno sa paglaum taliwala sa mga hagit sa kamahal sa palaliton, sa mga kalamidad ug kaguliyang sa palibot. Sama sa ikaduhang pagbasa, nakita niya uban sa mapadayunong pagsaksi sa kaayo ug gugma sa Ginoo ang dili mapakyas nga paglaum nga Mao si Kristo. Nagdahum siya nga matuman gayod ang kalingkawasa niadtong na puno sa paglaum.

Malahutayon ug mapadayunong ang kaalam, sumala sa unang pagbasa. Dili kini mohunong sa pagpangitag paagi aron ang plano sa kadaugan sa Ginoo motunhay. Ang pagbati sa kadaugan gipadayag sa nga kanunay pag-ampo, pag-alagad ug pagtudlo ug pag-ampo. Ang kaalam sa Ginno maantigo nga mobalanse sa tang panahon bisan usahay hinay ang tubag alang sa kausaban ug kabag-ohan. Ingon niini kapuno sa pasensya ang kinabuhi sa mga Santos nga atong gihandum sa niaging Domingo.

Busa, sumala sa Salmo, pangandoy ug batia ang kauhaw alang sa dagway sa Ginoo. Paninguhaa ang kanunay pag-igmat, paglaum ug paglahutay.