(Photo: Echerica U. Yamba)
Walo Ka Postulante Sa Discalced Carmelites, Gidawat Sa San Isidro Labrador Parish-Lumondao
Dako ang kalipay sa komunidad sa San Isidro Labrador Parish-Lumondao sa pormal nga pagdawat ug pagpaila sa walo ka postulante sa Order of Discalced Carmelites, Philippine Province of St. Teresa of Jesus, gikan sa Postulancy Formation House sa Monastery of the Holy Family. Gipaila sila sa mga parokyano atol sa Santos nga Misa niadtong Oktubre 25, 2026.
Sulod sa usa ka bulan, ang mga postulante mopuyo uban sa ilang tagsa-tagsa ka foster parents o pamilyang modawat kanila sa komunidad. Pinaagi niini, ilang masinati ang adlaw-adlaw nga kinabuhi sa katawhan sa nagkadaiyang sitio nga sakop sa parokya. Kabahin kini sa ilang pastoral nga pormasyon aron mas mailhan nila ang kahimtang, kultura, ug tradisyon sa mga komunidad nga ilang alagaran.
Pinaagi sa maong community exposure, gilauman nga mas molalom ang ilang pag-ila sa ilang bokasyon ug ang ilang pagsabot sa kinabuhi sa pag-alagad. Makatabang usab kini kanila sa pagpalig-on sa ilang tinguha sa pagpuyo sa mga tambag sa Ebanghelyo—pagkamasinugtanon, kakabos, ug kaputli—sumala sa espiritwalidad sa ilang kongregasyon.
Ania ang walo ka postulante ug ang mga pamilyang modawat kanila:
- Johnry Semillank Alfonso, gikan sa Pulupandan, Negros Occidental — mopuyo uban nila Mr. ug Mrs. Eddie Pelaris.
- Jasper John Domingo Abunyawan, gikan sa Project 6, Quezon City — mopuyo uban nila Mr. ug Mrs. Janel Olivar sa Zona 10.
- Moises Jr. Duhaylungsod Baula, gikan sa Sta. Cruz, Davao City — mopuyo uban nila Mr. ug Mrs. Purificacion Suyko sa Zona 8.
- Jerome Cuenca Sausa, gikan sa Lapuz, Iloilo City — mopuyo uban nila Mr. ug Mrs. Janilo Bayron.
- Joseph Tran Tuan Khan, gikan sa Phan Thiet, Vietnam — mopuyo uban nila Mr. ug Mrs. Fernando Villasan sa Zona 6.
- Mike Andrei Ng Fabionar, gikan sa Guiguinto, Bulacan — mopuyo uban nila Mr. ug Mrs. Jose Cinco sa Zona 4.
- John the Baptist Tran Quang Minh, gikan sa Dinh Quan, Dong Nai Province, Vietnam — mopuyo uban kang Mrs. Feliza Patayon.
- John Michael Lerio, gikan sa Caloocan City — mopuyo uban nila Mr. ug Mrs. Junalvin Fiel.
Atol sa ilang pagpuyo sa mga komunidad, makig-uban ang mga postulante sa mga kalihokan sa Gagmay’ng Kristohanong Katilingban (GKK) ug sa ubang pormasyon nga may kalabotan sa pagtuo. Kini nga mga kasinatian mahimong kahigayonan sa pagpaambit sa ilang nahibaloan, pagkat-on gikan sa katawhan, ug pagpalalom sa ilang pagsabot sa pag-alagad sa Simbahan.
Gihangyo sa parokya ang tanan nga iampo ang walo ka postulante aron padayon silang giyahan ug lig-onon sa Balaang Espiritu sa ilang pagpangandam ug pag-ila sa bokasyon. Hinaot nga pinaagi sa ilang pagpuyo uban sa komunidad, mas molalom ang ilang pagtuo ug kadasig sa pagtubag sa tawag sa Ginoo.
Mapasalamaton ang San Isidro Labrador Parish-Lumondao nga nahimong kabahin sa panaw sa mga postulante sa ilang community exposure. Ang maong kasinatian nagpahinumdom nga ang pag-ila sa bokasyon dili lamang mahitabo sa formation house, kondili molambo usab pinaagi sa pag-ampo, pagpakig-uban, ug pag-alagad sa katawhan sa Diyos.
Dalaygon ang Diyos sa gasa sa kinabuhi ug bokasyon!
(By Echerica U. Yamba | SILP Lumondao SocCom Coordinator)
No Comments