OLLP November 2026 23rd anniversary

Tripleng Selebrasyon Sa Bulan Sa Nobyembre Sa OLLP

Usa ka makahuluganon ug puno sa grasya nga tulo ka adlaw nga selebrasyon ang gihimo sa Our Lady of Lourdes Parish (OLLP), Bangkal, Davao City, niadtong Nobyembre 6, 8 ug 9, 2026. Naglangkob kini sa espirituhanong pagpangandam sa pag-abot ni Kristo, pagpanalangin sa bag-ong giayo nga mga pasilidad sa parokya, ug pagsaulog sa ika-23 nga anibersaryo sa kanonikal nga pagkatukod niini.

Nobyembre 6: Pag-abiabi kang Kristo Pinaagi sa Pag-ayo ug Pagpasaylo

Gisugdan ang mga kalihokan pinaagi sa Advent Recollection and Confession nga may tema nga “Welcoming Christ Through Healing and Forgiveness.”

Gipangunahan kini ni Sem. Mark Sipin gikan sa Diocese of Ipil, kinsa mipaambit sa iyang mga pagpamalandong mahitungod sa Pag-abot sa Ginoo, Divine Physician ug Internal Healing, ug sa Paghinulsol, Kalooy ug Pagpasaylo sa uban.

Sa iyang pagpamalandong, iyang gipasiugda nga ang tinuod nga pag-abiabi kang Kristo nagkinahanglan sa pag-ila sa atong mga samad, pagduol sa Ginoo alang sa kaayohan, pagdawat sa Iyang kalooy, ug pagkat-on sa pagpasaylo.

Gipahinumdoman usab niya ang tanan nga ang pagpasaylo usa ka lihok sa kabubut-on ug usa ka mahinungdanong lakang padulong sa kalinaw sa kaugalingon ug panag-uli.

Usa kini ka maayong pagpangandam aron sa pag-abli sa atong mga kasingkasing alang sa pag-abot ni Kristo—dili lamang pinaagi sa mga pulong, kondili pinaagi sa kinabuhi nga puno sa kalooy ug pagpasaylo.

Nobyembre 8: Bag-ong Panagway, Bag-ong Grasya

Duha ka adlaw human sa recollection, usa na usab ka makalipay nga selebrasyon ang nahitabo sa parokya.

Human sa alas 9:30 sa buntag nga Misa niadtong Domingo, Nobyembre 8, gipanalanginan ni Rev. Fr. Roger Duhaylungsod, Parish Priest, ang bag-ong giayo nga Parish Office nga nahimutang sa ground floor sa Pastoral Building, lakip ang kusina sa Rectory.

Mitambong sa maong kalihokan ang mga miyembro sa Parish Pastoral Council nga nagpakita sa ilang suporta ug kalipay sa padayon nga pagpalambo sa mga pasilidad sa parokya.

Dili lamang kini pagbag-o sa pisikal nga kahimtang sa lugar, kondili usa usab ka pagpamatuod sa pag-atiman sa mga kahinguhaan nga gigamit alang sa pag-alagad sa katawhan sa Diyos.

Ang bag-ong giayo nga mga pasilidad mahimong mas maayong lugar alang sa pagdumala, pagpakigsabot, pagplano ug pagpalig-on sa misyon sa Simbahan.

Nobyembre 9: 23 ka Tuig nga Panaghiusa ug Pagtuo

Ang kinatumyan sa tulo ka adlaw nga selebrasyon mao ang ika-23 nga anibersaryo sa Kanonikal nga Pagkatukod sa Our Lady of Lourdes Parish, nga nahitabo sa panahon usab sa Pista sa Dedikasyon sa Lateran Basilica sa Roma.

Gisaulog kini pinaagi sa usa ka Thanksgiving Mass sa alas 8:00 sa buntag, nga gipangulohan ni Rev. Fr. Roger Duhaylungsod.

Sa iyang homiliya, iyang gipasiugda ang usa ka lawom nga kamatuoran: “Bilihon ang simbahan kay kita man ang Simbahan.”

Iyang gipatin-aw nga ang simbahan nga atong gitukod nagsimbolo sa atong panaghiusa isip usa ka komunidad sa pagtuo. Naghimo kita og balay nga simbahan aron aduna kitay kapuy-an, tigumanan ug kapaingnan diin kita magkahiusa sa pag-ampo, pagsimba ug pag-alagad sa Ginoo.

Sa wala pa ang katapusang panalangin, mipaambit si Atty. Aileen Lourdes Lizada, usa sa mga importanteng tawo nga nahimong instrumento sa pag-angkon sa yuta diin gitukod ang parokya, sa kasaysayan sa pagkatukod sa OLLP.

Iyang gihisgotan ang pagtukod sa Catholics in Action on Relationships Enhancement (CARE) Foundation, nga gilangkuban sa 15 ka mga lider sa GKK isip mga incorporator, ubos sa pagpangulo sa Chairperson niini nga si Dr. Ma. Iris Melliza.

Ang maong pundasyon maoy nagdumala sa proseso sa pag-angkon sa propiedad ug sa pagpatukod sa parokya—usa ka dakong lakang nga naghatag og pundasyon sa paglambo sa OLLP.

Mipadayag usab sa iyang mga kasinatian si Engr. Gloria Cabillas, nga nangulo sa Finance Committee ug usa usab sa mga importanteng tawo nga nahimong bahin sa pagtukod sa parokya.

Iyang gipaambit ang mga hagit ug paningkamot sa pag-angkon sa yuta, pagpangita og pondo ug pagpondo sa pagtukod sa simbahan. Ang iyang mga kasinatian nagpahinumdom nga ang pagpatindog sa usa ka balay alang sa Ginoo dili sayon nga buluhaton. Nagkinahanglan kini og dakong pagtuo, sakripisyo, pagtinabangay ug pagsalig sa Balaang Panabang.

Tulo ka kalihokan, tulo ka mahinungdanong pahinumdom, apan usa ra ang mensahe: ang Simbahan usa ka komunidad nga nagkinahanglan og pag-ayo, pag-atiman ug panaghiusa.

Sa milabay nga 23 ka tuig, ang OLLP dili lamang nagtubo isip usa ka estruktura nga simbahan, kondili isip usa ka buhi nga komunidad sa mga magtutuo.

Kay sa katapusan, ang tinuod nga katahom sa Simbahan dili lamang makita sa iyang mga bungbong ug mga pasilidad, kondili sa mga kasingkasing nga nagkahiusa diha kang Kristo ug andam nga mag-alagad sa usag usa.

Malipayon ug mapasalamaton nga ika-23 nga anibersaryo, Our Lady of Lourdes Parish! (Rowena Baldoza Villaflor, OLLP SoCCom)

No Comments

Post A Comment