DCH Pamalandong

Ang Trono nga Kristohanon

Ika-34 na Domingo sa Ordinaryong Panahon; The Solemnity of Our Lord Jesus Christ, King of the Universe (November 22, 2026)
Ezekiel 34:11–12, 15–17 / Psalm 23:1–2, 2–3, 5–6 / Corinthians 15:20–26, 28 / Matthew 25:31–46

Unsa ba nga klaseng Trono ang angayan sa usa ka Kristiyano? Unsa ba nga gahum ang hulagway sa usa ka magtotoo?

Tataw sa unang pagbasa nga ang Maayong Magbalantay maoy magpakaon ug dili mohuthot sa iyang panon. Ang Ginoo mismo maghiusa ug dili mopatibulaag. Siya ang maghatag og pahulay ug kaayohan sa mga nasamdan. Pabalikon niya ang mga nagpalayo ug tigumon ang mga nahisalaag. Ingon niini ang klase nga Trono ug gahum nga iyang gigamit: ang gahum sa pag-atiman sa iyang panon. Mahimo ka ba nga kabahin niining lihok sa Dios aron ang gahum sa kabalaan ug ang iyang grasya motunhay?

Gipasabot sa ikaduhang pagbasa nga ang Trono ug gahum ni Kristo mopukan sa kamatayon. Siya maghatag sa kinabuhi. Iyang buhion ang mga naglisod. Pildihon niya ang mga nagpahimulos alang sa ilang kaugalingon lamang. Iyang panalipdan ang mga napukan kay siya man ang kinabuhi.

Sa kahimtang sa mga nangamatay tungod sa kagutom, kauhaw, giyera, pangpanghilabot sa dili ilaha, makasugpo ka ba pinaagi sa pagbarog sa kamatuoran ug kinabuhi? Imo bang dapigan ang kamatuoran ug kinabuhi nga naglantaw alang sa kaayong sa tanan?

Ang pagtoo dili mahimulag sa pagpangga ug pag-atiman sa mga kabos. Kini gipakita diha sa Ebanghelyo sa trono nga mahimayaon nga naghatag og priyoridad sa mga kabos, binilanggo, gigutom, ug mga langyaw. Ang matuod nga trono dili kadtong halayo ug walay hanaw sa kahimtang sa mga anaa sa ubos, sa mga mayukmok. Hinunoa, kadtong nasayod ug mohimog lakang alang sa pagpagaan sa bug-at nilang kahimtang maoy pagpadayag sa tunhay nga trono. Ang matuod nga gingharian masukod dili sa pag gamit sa kahimtang sa mga anaa sa ubos alang lang sa kaugalingong interes, kondili sa tuyo nga ma haw-as ang mga naglisod ug nanginahanglan sa ilang mapait nga kahimtang. Ang Trono ug gahum sa matuod nga magtotoo anaa sa paghatag og bili sa mga nanginahanglan. Andam ka ba nga mo himo sa tanan alang sa mga napadaplin sa katilingban?

Busa, sa atong pagsaulog sa Solemnidad ni Kristong Hari, ihalad nato ang atong kusog, talento ug kutob sa unsay mahimo alang sa pagtunhay sa gingharian sa kinabuhi, sa kamatuoran ug gugma. Wala unta kitay panganduyon pa gawas sa Dios kay siya ang atong magbalantay. Ug diha kaniya kita dili na magkulang.

No Comments

Post A Comment