166th parochial fiesta gisaulog

Niining pagsaulog sa Tuig sa mga Layko, ang pagsaulog sa ika-166 nga kapistahan sa San Pedro Cathedral naghatag og pagtagad alang kanila.

Subay sa tema nga: “San Pedro: Sulundon sa Laykong Magtutuo kang Kristo,” pipila sa mga kalihukan nga gihimo naghatag og pagtagad sa kahimtang sa mga layko.

Aron ipakita ang dignidad ug ka-sagrado sa sakramento sa kaminyoon, gihimo ang Mansibado Wedding alang sa mga pares nga nagpuyo-puyo nga wala pa gikasal ug ubang pares nga gikasal sa civil rite, niadtong Hunyo 7.

Niadtong Hunyo 22, gihimo usab ang Blood Letting nga gitambongan sa mga laykong donor nga midonar sa ilang dugo alang sa mga nanginahanglan sama sa mga naa sa ospital nga nagapalit og dugo gikan sa mga blood donors.

Aron ipakita ang talento sa mga parokyano ilabi na diha sa nagkadaiyang Gagmay’ng Kristohanong Katilingban (GKK), gihimo sa parokya ang Socio-Cultural Night niadtong Hunyo 27 sa San Pedro Cathedral Auditorium.

Aron pagpabilin sa tradisyon sa parokya, gihimo sa San Pedro Cathedral ang prusisyon sa imahe ni San Pedro sa kadalanan sa alas 3, niadtong Hunyo 28. Gisaulog usab sa maong adlaw ang ika-34 nga anibersaryo sa Dedication of the Metropolitan Cathedral of San Pedro sulod sa Misa nga gisaulog sa alas 5:30 sa hapon.

Sa adlaw sa kapistahan, Hunyo 29, gikumpirmahan usab ang mga parokyano ug uban pa sa confirmation ceremony nga gihimo sa alas onse sa buntag.

Mapasalamaaton ang mga kaparian sa San Pedro Cathedral nga gipangulohan ni Abp. Romulo G. Valles ug Msgr. Leonardo Vicente sa tanan nga misuporta ug manggihatagon nga mihatag sa ilang panahon, oras ug bahandi aron mamahimong malampuson ang kasaulogan sa kapistahahan.

Gi-awhag usab ni Abp. Valles nga saulogon sa tibuok Arkidiyosesis ang kapistahan ni San Pedro tungod kay siya ang patron sa tibuok Dabaw ug dili lamang sa mga parokyano sa San Pedro Cathedral.