Lasang Parish gilusad ang year-long golden jubilee celebration

Isip pagpangandam sa umaabot nga ika-50 nga kapistahan sa parokya sa St. John the Baptist sa Lasang, gilunsad sa mga parokyano ang year-long golden jubilee celebration.

Human sa misa niadtong Domingo, Hunyo 15, gipahigayon sa parokya ang motorcade sugod sa Lasang padulong sa Panabo City ug sa Bunawan. Kini gitambongan sa mga miyembro ug lideres sa mga Gagmay’ng Kristohanong Katilingban (GKK), barangay officials ug mga religious congregations nga nahisakop sa territorial jurisdiction sa parokya.

Gihinumdom usab sa maong paglunsad ang mga katuigan nga milabay ilabi na sa panahon nga wala pa natukod ang parokya ug kaniadtong gihinganlan pa ang parokya nga Sta. Catalina Parish hangtud napili nga si San Juan Bautista ang mamahimong patron sa mga parokyano sa Lasang.

Kabahin usab sa maong selebrasyon ang paglusad sa Commitment Wall diin gisulat sa mga lideres ug kaparian sa Lasang ang ilang panaad ug kaakuhan sa pagserbisyo sa katawhan nga sakop sa parokya sa Lasang. Ang mosunod mao ang testimonya ni Ofelia G. Cadelina, Parish FLA Coordinator, kini iyang gisaysay sa paglusad sa Commitment Wall.

Parang kalian lang. How time flies. Kaniadto 49 years na ang milabay, ang mga katawhan kung gusto nilang mosimba, mobaktas pa kana sila og ubay-ubay ka kilometro ang gilay-on ug nasinati nila kini sulod sa ubay-ubay usab, nga mga katuigan, ug wala silay laing ginadamgo kon dili matukuran na unta ug simbahan ug mahatagan na usab og pari ang ilang dapit.

Ug salamat kay ang maong damgo natubag ug nahatagan an ug kasulbaran. Human matukod sa hinay-hinay ang parokya, daghan ug ubay-ubay ang mga nalipay kay sa katapusan gidungog na gayod ang ilang mga pag-ampo sa atong mahal nga santos, Sta. Catalina ug San Juan Bautista. Tinuod man nagsugod ang maong kabag-ohan ug nalipay gayud pag-ayo ang mga tao.

Pinaagi sa mga tabang sa mga katawhan ug matinud-anon  nga pagdumala sa mga nagkalain-laing mga kaparian mitubo ug milambo kining atong parokya. Ug karon kay hapit na man ang ika 50 o golden anniversary sa atong mahal nga parokya, ang tanan gayud gibati og kalipay, tungod kay matud pa nila kabahin kami sa pagtubo ug pag-uswag niining maong parokya. Adunay pipila nga malipayong miingon, ang akong edad mao usab ang pangidaron sa parokya kay mao man ang pagkatawo nako sa pagtukod niini. Ang uban miingon kabahin daw siya kay siya ang unang gibunyagan, kabahin daw sila kay sila ang unang gikasal ug uban pang halandumon uyamot sa nagapadayon nga pag-uswag sa atong parokya.

Busa, karon ang tanang mga tawo/parokyano nagmaya/nagmalipayon ug misinggit sila sa kalipay sa pag-ingon mabuhay ang parokya, mabuhay Sta. Catalina ug mabuhay Sr. San Juan Bautista. Sa katapusan atong itunol ang atong hiniusang pagpasalamat. Salamat mahal namo nga patron sa pag-alima nimo kanamo physically, emotionally, intellectually and spiritually. Salamat gahapon, karon ug ugma. Kung wala mo, wala kami mahimo. Ug karon sa umaabot nga Golden Anniversary sa atong mahal nga parokya, bag-ohon na usab namo ang among mga panaad pinaagi sa pagsulat niini sa commitment wall. Kini nagasimbolo ug nagapakita sa atong mga damgo alang sa dugang pagpalambo sa atong pagtoong Kristohanon dinha sa atong parokya. Busa tungod kay kita nahisakop man sa nagkadaiyang sector sa atong simbahan ug komunidad, managlahi usab ang atong panaad nga pagahimoon. Hinaut unta nga ang atong mga gisulat sa commitment wall maoy magpahinumdom kanato kanunay sa atong mga kaakuhan isip sakop sa atong parokya ug dili lang unta kana magpabilin nga mga sulat lamang dinha sa bungbong, kon dili uban gayud dinha ang atong kasing-kasing ug kalag. Ug rest assured nga kon unsa kamatinud-anon kaniadto ang among mga panaad, doblehon kana namo karon, ora mismo. Promise.