Ang batong sukaranan ug ang mga yawe

Ang Ginoo may sambingay, “usa ka tawo nga maalamon nga nagtukod sa iyang balay diha sa bato. Sa dihang mibundak ang ulan, ug mibaha ang suba, ug ang hangin mihapak ug mikusokuso niadtong balaya, wala kini matumba kay natukod man diha sa bato.” (Mt. 7: 24-25)

Sa 12 ka mga apostoles, kang Simon lang nga ngalan ang giusab ni Kristo, “Ikaw si Simon.., apan sukad karon nganlan ka nag Cefas (nga sa ato pa, Pedro, o Bato) (Jn. 1:42). Ang Ginoo nagsulti kang San Pedro, “ikaw usa ka bato ug niining batong sukaranan tukoron ko ang akong simbahan, ug bisan gani ang kamatayon dili gayod makabuntog niini. (Mt. 16:18). Ang Ginoo nagsulti pud kang San Pedro, “Ihatag ko kanimo ang mga yawe sa Gingharian sa langit”(Mt. 16:19) Unsa ang mga yawe? Ang mga magtutudlo sa Balaod, gisultihan sa Ginoo, “Gitipigan ninyo ang mga Yawe na maoy moabli sa pultahan sa balay sa kahibalo, “(Lk. 11:52). Ang mga apostoles gisugo sa pagwali, sa pag ayo sa mga masakiton, pag-abog sa mga yawa, ug pagbanhaw sa mga patay (Mt. 10: 1,8), apan si San pedro lang ang  gihatagan sa Ginoo sa mga yawe sa Gingharian sa langit, “ ang yawe nga maoy moabli sa pultahan sa balay sa kahibalo.”

Ang mga sumusunod sa simbahan nga gipangulohan ni San Pedro wala gayod mahitabo nga nagtudlo og pagtulon-an nga supak sa kamatuoran kay si San Pedro lang ug ang mga mosunod kaniya nga Santo Papa mao ang nakadawat sa “yawe nga maoy moabli sa pultahan sa balay sa kahibalo.” Samtang ang uban nga sumusunod sa ubang mg apostoles nakahimo sa pagtudlo supak sa kamatuoran bahin kang Kristo ug mahitungod kang Santa Maria.

Sa mga sumusunod sa 12 ka apostoles, ang sumusunod lang ni San Pedro ang milahutay pagbarug sukad sa sinugdanan hangtod karon kang Santo Papa sugod kang San Pedro ug ang atong Santo Papa Francis mao ang ika 266th.

Ang mga simbahan nga natukod sa nagkalain-laing mga apostoles anaa na karon ubos sa pagmando sa mga dili kristiyanos. Ang simbahan sa Jerusalem nga sa sinugdan gipangulohan ni San Santiago mao ra ang ubos sa pagmando sa mga Judeo/Israelita. Ang Simbahan nga gitukod diha kang San Pedro mao na alang nagpabilin sa iyang gipanag-iyang kaugalingong siyudad. Vatican City, ang situdad nga dili ubos sa pagmando sa laing mga nasud o kagamhanan. Gipasalig sa Ginoo nga bisan ang gahom sa impiyerno dili gayod makabuntog sa Simbahan nga Iyang gitukod diha sa Bato/Perdo “aron pinaagi sa Simbahan masayran – – ang kaalam sa Dios diha sa nagkalain laing paagi.” (Efeso 3:10)