Didto pangitaa kung asa nawala!

Kapistahan sa Pagpasidungog sa Santa Krus
Num. 21:4-9/ Ps. 78:1-2, 34-38/ Phil. 2:6-11/
 Jn. 3:13-17

Gabii na, hapit na naupos ang iyang pasensiya sa pagpangita sa iyang cellphone, nalibot na niya tanang suok sulod sa ilang balay. Na disturbo na ang mga kaubanan sa balay. Gipangutana siya… Naunsa ka? Mitubag siya…  nawala ang akong cellphone. Gitabangan siya’g pangita. Ug wala gyud makit-i. Gipangutana siya… sa imong mahinumduman asa kaha dapit nimo nabilin o nalimtan? Sa GAWAS. Mitubag siya. PASTILAN…unya nganong sa sulod sa balay man ka nangita nga tua man kaha sa gawas nawala? Siya mitubag… ngitngit man gud didto, delikado nya bagnot pa gyud! Ug giingnan siya… DIDTO PANGITAA KUNG ASA NAWALA.

Gisaulog nato karon ang kapistahan sa Pagpasidungog sa Santa Krus. Ang unang pagbasa naghisgot sa pagbuhat ni Moises ug bitin nga tumbaga, ug gibutang kini niya sa tumoy sa usa ka tukon; ug kon ang hipaakag bitin motan-aw sa bitin nga tumbaga, dili siya mamatay.

Sa ebanghelyo, gibalik-hisgot ni San Juan (Num. 21:9-11)… ingon nga giisa ni Moises didto sa kamingawan ang bitin nga tumbaga nga gibutang ug tukon, ang Anak sa Tawo kinahanglan nga iisa usab, aron ang tanan nga motuo Kaniya makabaton ug kinabuhing walay katapusan.

Gipasundan usab ni San Pablo sa ikaduhang pagbasa (Phil 2:6-11) unsay gipasabot niining tanan, sa pag-ingon… Nagpaubos siya ug nagmasinugtanon hangtod sa kamatayon – ang iyang kamatayon sa            Krus. Tungod niini gituboy siya sa Dios ngadto sa kinatas-ang dapit sa kalangitan, ug gihatagan siya’g ngalan nga labaw sa tanang ngalan.

Sa storya labot sa cellphone nga nawala… Didto pangitaa kung asa nawala! Atong mabalik-lantaw ang nahitabo sa dihang misupak sa Dios ang tawo (Gen. 3:1)… sa tanang mananap nga gibuhat sa GINOO, ang bitin mao ang labing abtik. Gidid-an ba diay kamo sa Dios pagkaon sa bunga sa tanang kahoy sa tanaman?

Ang Vatican II nagsaysay usab niining storya sa salang panulundon (Original Sin). Ang atong unang mga ginikanan gitintal sa yawa. Ilang giabusaran ang kagawasan diha pa sa sinugdanan. Nagmasinupakon ang tawo batok sa Dios, nakasala ug gipapahawa sa tanaman sa Eden. Nalansisan ang tawo sa bitin. Napukan ang tawo.

Ang mapa-akag bitin, mamatay, apan ang motan-aw sa bitin nga tumbaga, dili mamatay. Sa samang pagka-agi… diha sa kamatayon sa Krus ni Kristo Jesus kita nakabaton ug kinabuhing walay katapusan. Busa kita makalaum nga sa matag suliran anaay solusyon, ug sa matag gapos anaay sulbad. In every PROBLEM there is always a SOLUTION.

Kung asa kita nakasala o nahisalaag didto                                  usab ang kaluwasan.

 Kung asa kita mangawala didto ra usab kita                               makaplagan.

Didto pangitaa kung asa nawala.

Sa ingon ang Simbahan mituwaw sa gibii sa tanang gabii, bihilya sa tanang bihilya…

Bihilya sa Pagkabanhaw (Easter Vigil):

… Mao kini ang gabii kanus-a gilugti ni JesuCristo ang mga talikala sa kamatayon ug nabanhaw siya nga madaugon. O katingalahang panumbaling sa imong kaluoy nganhi kanamo! O dili masukod nga pagpangga sa gugma! Aron matubos mo ang     ulipon gitugyan mo ang imong bugtong Anak. O palaran nga sala, kadtong karaang paglapas ni Adan, nga nakaangkon sa ingon ka-dakong Manunubos!

Malipayong Pagsaulog Sa Pagpasidungog sa Santa Krus kaninyong tanan!