Ang Atong Gihimo Sa Ubos Niyang Igsuon Gihimo Nato Kaniya

Solemnidad ni Kristong Hari
Ez. 14:11-12, 15-17/ Ps. 23:1-6/ 1 Cor. 15:20-26, 28/ Mt. 25:31-46

Matag katapusang Domingo sa tuig, sa dili pa nato sugdan ang bag-ong tuig sa liturhiya nga mao ang unag Domingo sa adbiyento, gisaulog sa tibuok Simbahan ang Solemnidad ni Kristong Hari. Human nato gisaulog sa tibuok tuig ang Iyang kinabuhi ug ministriya, atong Siyang gipasidunggan isip Hari sa tanang Hari. Ang atong mga pagbasa nagpunting sa tulo ka mga kinaiya ni Kristo isip Hari.

Una, Siya maayong magbalantay. Sa Iyang kinabuhi, Siya nagmapuanguron ug nagmanggiluy-on. Gidawat Niya ang mga nahisalaag. Gikaloy-an Niya ang mga nakasala. Giayo Niya ang mga masakiton. Duna Siya’y pagbati sa mga nanginahanglan. Dili Siya bintahuso ug abusado sa gahum isip hari, kondili gigamit Niya ang Iyang gahum alang sa kaayohan sa isigkaingon.

Ikaduha, Siya maisugong mibuntog sa kamatayon. Wala Siya magpabilin sa lubnganan human Siya gipatay, kondili nabanhaw Siya. Bisan ang kamatayon Iyang gisangyawan sa dakong gugma ug kalooy sa Dios. Wala nay gahum ang kamatayon atubangan Kaniya. Dili Siya talawan ni maniguro sa kaugalingon lamang. Kinabuhi Niya andam itahan aron lamang mabuhi kita nga Iyang gimahal. Sama Kaniya, wala nay gahum ang kamatayon kanato.

Ikatulo, Siya Hari nga labing ubos. Siya nagtakuban diha sa mga labing ubos. Pulong Niya nga sa matag higayon nga gipakaon nato, gipainom, giduaw, gidawat, giatiman ug gibistihan ang mga labing ubos Niyang mga igsuon, ato daw usab kini nga gihimo Kaniya. Siya anaa sa mga labing ubos nga naghulat atong alagaran. Dili Siya garboso ug mapahitas-on. Mapaubsanon ang Iyang kinaiya.

Ato untang saulugon ang Solemnidad ni Kristong Hari uban sa pagsalig nga Siya kanunay nagbantay kanato. Maisugon unta kita matag adlaw nga moharung sa hagit sa kamatayon aron ipakita unta nato kanunay nga buhi kita sa pagtuo. Ug nga magpabilin unta kitang mapaubsanon ug magmaalagaron sa mga ubos natong mga igsuon. Mabuhi si Kristo, ang Hari sa tanang Hari!