Ang Sakramento sa Eyukaristiya

P: Unsa man ang gipahayag sa Eyukaristiya diha sa kinabuhi sa Simbahan?

T: Kini mao ang tinubdan ug kinatumyan sa tibuok Kristohanong kinabuhi. Diha sa Eyukaristiya, ang makapasantos nga lihok sa Dios alang kanato ug ang atong pagsimba kaniya makakab-ot sa ilang hataas nga ponto. Gilangkob niini ang tibuok espirituhanon nga kaayohan sa Simbahan, si Cristo mismo, nga atong Paskuwa. Ang Eyukaristiya nagapadayag ug nagapabunga sa kahiusahan uban sa diosnong kinabuhi ug sa panaghiusa sa Katawhan sa Dios. Pinaagi sa eyukaristikan-hong kasaulogan kita nahiusa na sa liturhiya sa langit ug may pasiunang pagtilaw sa kinabuhi nga tunhay.

P: Unsa man ang mga ngalan niining sakramentoha?

T: Ang dili matugkad nga kabahandianon niining sakramentoha gipadayag diha sa nagkadaiyang ngalan nga nagapunting sa lainlaing mga dagway niini. Ang labing komon nga mga ngalan mao: ang Eyukaristiya, ang Santos nga Misa, ang Panihapon sa Ginoo, ang Pagpikaspikas sa Pan, ang Eyukaristikanhong Kasaulogan, ang Handomanan sa pagpasakit, kamatayon sa Pagkabanhaw sa Ginoo, ang Balaan nga Sakripisyo, ang Balaan ug Diosnong Liturhiya, ang Balaan nga mga Misteryo, ang labing Balaan nga Sakramento sa Altar, ug Santos nga Komunyon.

P: Asa man mahisibo ang Eyukaristiya diha sa diosnong laraw sa kaluwasan?

T: Ang Eyukaristiya gitimaan nang daan diha sa Karaan nga Kasabotan labaw sa tanan diha sa tinuiug nga pangaon sa Pagsaylo nga gisaulog matag tuig sa mga Judiyo uban sa pan nga walay pagtubo aron sa paghandom sa ilang dinalian, maluwasnong pagkagiw gikan sa Ehipto. Si Jesus mitagna niini sa iyang pagtulun-an ug mitukod niini sa dihang nagsaulog siya sa Kataposang Panihapon uban sa iyang mga apostoles diha sa pangaon sa Pagsaylo. Ang Simbahan, maunongon sa sugo sa iyang Ginoo, “Buhata kini aron paghandom kanako” (1 Corinto 11:24), sa kanunay misaulog sa Eyukaristiya, labi nasa Domingo, ang adlaw sa Pagkabanhaw ni Jesus. (Kompendiyo sa Katesismo sa Simbahang Katoliko, 274-276)