Responsible Parenthood Gikinahanglan

Sumala sa Santo Papa, angay tutukan ang responsableng pagkaginikanan kon responsible parenthood nga maoy labaw nga gikinahanglan karong panahona.

Di pa dugay nga mibisita ang atong Santo Papa Francisco dinhi sa nasud ug ubay-ubay gayud ang mga mensahe nga iyang gipadangat sa mga Pilipino ug usa niini mao ang pagpahinumdom sa panudlo nga dili gayud uyon ang Simbahan sa paggamit sa “artificial contraception” alang sa pagplano sa pamilya.

Subli niyang gipanalibdan ang 1968 encyclical nga Humanae Vitae mahitungod sa pagsupak sa Katolikong simbahan batok sa “artificial contraception.” Matud pa niya nga magbantay gayud kita sa ginatawag ug “ideological colonization” ug matag usa angayan gayud nga manalipod sa iyang pagkatawo.

Hinuon iyang gisaysay nga adunay natural nga mga pamaagi sa pagplano sa pamilya nga uyon ang simbahan.

Niadtong Enero 13, sa usa ka panagtigum nga giuluhan ug “Parenting Today’s Youth”, Usa sa mga mensahero mao si Dr. Lou Querubin, usa ka doctor ug psychiatrist didto sa kauluhan. Didto iyang gipadayag kung unsang klase ang mga batan-on duna karon pinaagi sa “Young Adult Fertility Survey 2013.” Padayon ang pagdaghan sa mga batan-on nga nabuntisan, ubay-ubay ang nigamit sa druga, ug padayon ang panginahanglan sa presensya ug pagmatuto sa ginikanan.

Matud pa ni Dr. Querubin, mas labaw’ng gikinahanglan ang pagkaresponsableng pagkaginikanan karong mga panahona. Dugang pa niya, gikinahanglan gayud ang pagmugna ug estraktura sa kinabuhi sa mga batan-on hilabi na sa pangidaron nga 13-17 anyos.

Angayang hatagan ug bili ang pagkaresponsableng pagkaginikanan subay sa gipadayag sa Santo Papa ug sa panudlo sa simbahan-kristohanon nga pamaagi ug dili gikan sa mando sa RH Law. Magbantay ang tanan nga dili mahulog sa laang sa “ideological colonization”. Hinuon, lig-onon pa gayud ang kalihukan ug mga programa alang sa kalambuan sa Kristohanong pamilya. (Nelson A. Bitang)