Chill lang! Arsobispo Nanawagan nga Atimanon ang Batan-on

Ubay ubay na ka mga GKKs ang natuyok ni Abp. Valles nga nagsaulog sa ilang mga kapistahan karong tuiga. Usa ang GKK Del Carmen sa San Pablo Parish nga nahimutang sa Matina Aplaya ang iyang gimisahan nga nagsaulog sa ika-147 nga kapistahan.

Ang ebanghelyo nga gibasa ni Fr. Jupiter Morales niadtong Hulyo 16 nga nipunting sa pagpas-an nato sa atong yogo og paghatag niini kang Hesus maoy mensahe nga gipaklaro ni Yanong Muloy.

Tulo (3) ka pamalandong ang iyang gipaambit.

1. Pasalamat — “Karon testimonya kita kung unsa ka lig-on ang liso nga gitisok nila sa una. Atong pasalamatan ang Diyos sa mga ‘ancestors of faith’ sa pagsaulog sa atong simbahan.”
2. Chain of Faith — Gipasabot ni Yanong Muloy ang pagtoo nga wa nagdepende sa mga tawo nga anaa sa Simbahang Katoliko. Gani, gibalik-lantaw niya ang kinabuhi sa mga apostoles ug ang ilang mga kahuyang sama ni San Pedro, apan “wala maputol ang chain of faith.”
3. Kabalaan ni Maria ug ang mga bukid sa Bibliya — Mt. Sinai, Kalbaryo og Del Carmen mao ang pipila lamang ka mga bukid nga gipunting ni Yanong Muloy. Ang maong mga yutang istruktura nagpasabot sa kabalaan og pagsakripisyo “nga dali natong masinati, dali makita ang presensya sa Diyos. Duha ining mga bukid (Carmel og Kalbaryo), anaa si Maria.” Sa katapusan, gipabilin ni Yanong Muloy ang iyang panalangin uban ang panabang ni Birhen Maria diha sa Santos nga Eyukaristiya. “…kung makaila kita sa Diyos, tanang kabug-at, burden, yoke, dad-on sa Ginoo. Chill lang! Atimana ang mga batan-on nga maoy musunod nato sa pagsaulog sa mas daghan pang katuigan.”